Ashley Urbaneja ta un hobencita di 11 aña di edad cu ta destaca den e deporte di rhythmic gymnastics. Den un entrevista special pa Bon Dia Aruba, Ashley hunto cu su mama, Mariana Urbaneja ta conta di su carera den gymnastics, su logronan y su soñonan pa futuro.

Ashley a cuminsa cu su carera den rhythmic gymnastics cu apenas tres aña y mey di edad. E ta naci na Maracay, Venezuela y el a cuminsa su entrenamento na e Club Alfa bao direccion di e coach Orquidia Ramos.

Mama di Ashley ta splica cu a traves di e diferente evaluacion- y competencianan interno y estatal, e coach a ripara cu Ashley tin cualidadnan grandi pa destaca den e deporte aki. Despues di algun aña, cu casi shete aña di edad, Ashley hunto cu su mama a bandona nan pais y a yega Aruba pa asina reuni cu su tata, kende ya caba tabata biba y traha na Aruba.

“Nos ta sumamente agradecido na e isla pa tur e oportunidadnan cu nos ta ricibi, specialmente Ashley,” Sra. Urbaneja a resalta.

El a sigui conta cu despues di nan yegada na Aruba di biaha nan a cuminsa cu investigacion pa wak cual tabata e clubnan di rhythmic gymnastics na Aruba y asina a yega na e club Avanse. Aki e coach Adriana Sevilla a haci tur e evaluacionnan necesario y Ashley a demostra su talento y cualidadnan cu el a siña durante su entrenamento na Venezuela.

Ashley su prome competencia internacional representando Aruba tabata den luna di juni di aña 2018 cual a tuma luga na Costa Rica caminda Ashley a logra conkista e prome medaya di oro den rhythmic gymnastics pa Aruba.

“Esaki tabata un incentivo grandi pa Ashley y tambe pa e comunidad Arubiano, pasobra a traves di e logronan di Aruba durante e competencia aki, e deporte di rhythmic gymnastics a cuminsa bira mas conoci y mas popular”, Urbaneja a indica.

Den luna di mey di aña 2019, Ashley hunto cu demas delegacion di rhythmic gymnastics di Aruba a biaha pa Miami pa e competencia internacional Rhythmic Art, na unda un biaha mas Ashley a sa di resalta y trece diferente medaya pa Aruba.

“Ashley a gana medaya di oro den e categoria di freestyle, medaya di plata den categoria di hoepel y medaya di brons den all around. E tabata e unico atleta di Aruba cu a logra subi podium. Un orguyo pa nos”, Urbaneja a agrega.

E mesun aña, durante e competencia internacional Copa di Aruba, na unda mas di 11 pais tabata presente na Aruba pa participa, Ashley a bolbe subi podium y gana medaya di plata y di brons pa Aruba.

Durante e ultimo competencia cu a tuma luga na Aruba mes, Internacional Cup Aruba, Ashley a haci un excelente trabao un biaha mas representando Aruba. “Mi kier enfatisa con orguyoso nos ta sinti como famia, como pilarnan fundamental den su desaroyo y educacion. Ademas nos ta super agradecido na su coach Adriana Sevilla tambe”, mama di Ashley a enfatisa.

“Mi ta kere cu su perseverancia, responsabilidad, enfoke y su amor pa gymnastics, a yud’e yega caminda e ta. E semper a bisa cu maximo deseo ta pa bira un gimnasta profesional y e cualidadnan aki ta sigui yud’e pa e sigui avansa den su deporte”, el a agrega.

Di otro banda, Urbaneja ta splica, cu pa motibo di ta un mucha Latino cu ta representa Aruba, e tin cierto limitacionnan. Por ehempel, tin competencianan Sur Americano of Centro Americano, pero Ashely no por representa Aruba pa motibo cu e no tin un paspoort Hulandes.

Urbaneja a remarca cu Aruba tin hopi prospecto den deporte. Manera cu tin cu ta nativo di Aruba, tambe tin hopi deportista Latino cu lo por representa Aruba y laga su nomber briya internacionalmente, pero lamentablemente e oportunidadnan, di cierto manera ta limita.

“Mi ta spera cu den futuro lo por existi e oportunidad y e proyecto hunto cu e Minister di Deporte y e Gobierno di Aruba cu lo por duna e muchanan aki cu ta stima Aruba y stima nan deporte, di representa oficialmente Aruba den otro competencianan grandi internacional”, el a bisa.

Di mesun manera, Urbaneja a splica, cu pa motibo di no tin paspoort Hulandes, durante e entrega di premionan Excelencia den Deporte, Ashley, lastimamente, tabata e unico mucha di su ekipo di gymnastics no por a wordo considera pa un premio. “Esaki tabata algo cu a afecta Ashley y a haci hopi dolor pasobra e ta stima Aruba cu henter su curason y e ta carga su bandera na su curason ora cu yega e momento di representa Aruba den su deporte”.

Por ultimo Ashley ta gradici tur persona cu di un of otro forma ta y a yud’e crece den su deporte. “Tur loke mi ta y unda mi ta awe mi ta gradici mi mayornan, mi wela cu ta na shelo, mi famia na Venezuela. Tur ta importante pa mi, pero otro persona cu ta hopi importante den bida ta Dios, nada lo por ta posibel sin dje. Mi kier cumpli mi soño y mi kier representa Aruba den un olimpiada den rhythmic gymnastics. Mi gusta intercambia experiencianan cu muchanan di otro paisnan pasobra e ta yuda mi siña tecnicanan nobo y exigi mi mes mas ainda pa ta miho.”