(Reuters) – Fiscal Merrick Garland a nombra un asesor special siman pasa pa investiga e almacenahe inapropia di documentonan clasifica na cas y ex-oficina di presidente Joe Biden, un echo di un investigacion amplio dirigi riba ex-presidente Donald Trump.
E investigacion ta un distraccion pa e presidente Democrata, kende a critica e maneho di material clasifica di su predecesor Republicano, y por pone un sombra riba Biden mientras ambos homber ta prepara pa un posible ‘rematch’ den eleccion 2024.
Garland a bisa cu Robert Hur, kende a sirbi como fiscal federal top na Maryland bao Trump, ta bay actua como un fiscal quasi-independiente pa determina di recordnan clasifica for di tempo di Biden como vicepresidente a keda almacena inadecuadamente na su residencia na Delaware y un think tank na Washington. Garland a bisa cu Hur ta bay examina “si cualkier persona of entidad a viola ley.”
Cas Blanco a bisa cu algun material a wordo haya den un garage na cas di Biden y un camber pega na dje. A priminti di coopera cu e investigacion. “Nos tin tur confiansa cu un investigacion profundo ta bay mustra cu e documentonan aki a wordo poni fuera di lugar, y cu e presidente y su abogadonan actua rapidamente despues di descubri e eror”, abogado di Cas Blanco, Richard Sauber a bisa den un declaracion.
Contestando pregunta di prensa diahuebs tocante e sabiduria di warda material importante banda di su Corvette, e presidente auto-declara “car guy” a bisa cu ambos tabata den un garage bao yabi. “No manera nan tabata poni riba caya”, el a bisa. “Hende sa cu mi ta tuma documentonan y material clasifica na serio.”
Biden y Trump awo cada un ta enfrentando investigacion di fiscalnan special, cu tipicamente ta wordo nombra pa casonan politicamente sensitivo pa sigura un grado di independencia for di liderazgo di Departamento di Husticia. Pero expertonan legal ta bisa cu nan casonan no ta igual.
Cas Blanco a bisa cu abogadonan di Biden a haya un cantidad chikito di documentonan clasifica y a entrega nan despues di e descubrimento. Trump a resisti di entrega nan te cu un inval di FBI na augustus a haya 100 documento clasifica, lantando pregunta si Trump of su personal a obstaculisa e investigacion.
