(AP)—Den un caso cu a trece un shock amplio den publico, un corte na Cambodia a entrega carga na un entrepreneur di real estate cu titulo honorario cu asesinato premedita di un pareha jong den e capital Phnom Penh.
Red social tabata yena cu comentario bisando cu e sospechoso probablemente no lo ser condena pasobra e ta rico, cual ta un perspectiva comun tocante e sistema hudicial den e pais Sur-Asiatico. E corte a duna huicio diasabra.
E sospechoso, Srey Siña di 50 aña di edad, supuestamente a tira Long Lysong di 27 aña y su comprometida Khim Kanchana di 25 aña dia 17 di juni mientras e tabata interveniendo un disputa entre bisiñanan. Dos otro victima a keda herida.
Tambe a duna Srey Sina carga di intento pa asesina y posesion ilegal di un arma pa e Phnom Penh Municipal Court, segun un declaracion publica diadomingo pa e ministerio di Husticia. El a bisa cu e cargonan lo ser procesa den dos procedemento separa, cada un permitiendo un sentencia maximo di 15 aña den prizon. Cambodia no tin e castigo di morto. Fiscalnan a bisa cu carganan adicional por ser implementa despues di mas investigacion.
E corte a ordena e sospechoso keda deteni na e Prey Sar prizon. E no tabata disponible pa comentario y tampoco por a haya contacto cu oficialnan di corte pa puntra si e tin un abogado. E caso a atrae atencion masivo no solamente pa via di e asesinato aparentemente no provoca di un pareha jong y e disputa cu a causa esaki, pero pasobra e sospechoso tabatin e titulo di Oknha, un honor duna pa empresarionan cu ta haci donacionnan grandi na gobierno.
E titulo Oknha ta asocia generalmente cu magnatenan influencial cu ta considera como bon amigo di e People’s Party gobernante di Cambodia, cual tin e poder pa casi cuatro decada caba. Pero tin aproximadamente 1,300 hende cu e titulo ey, mayoria di cual, manera e sospechoso, no ta personanan conoci den publico.
Inoficialmente, e titulo ta asocia cu impunidad pa esnan rico, sirbiendo como un tipo di exencion of un manera pa scapa e regulacionnan di gobierno. Cualkier caso envolviendo criminalidad obvio—manera un atake fisico of narcotraficacion, pa ehemplo, cu ta atrae interes publico por trece critica na e gobierno, haciendo e vulnerable pa atakenan di su oponentenan.
Den reconocemento di sensitividad politico, prome minister Hun Manet y miembronan di su gobierno a publica un condolencia pa e mortonan y a duna siguransa cu husticia lo ser persigui. Despues di su detencion Srey Siña a perde su titulo pa Rey Norodom Sihamoni. Al menos dos otro posesor di nan titulo a perde di nan den conexion cu casonan di fraude.
A reporta cu e tiroteo siman pasa a resulta for di un disputa entre e victimanan y un di nan bisiña, ken tabata un teniente di un propiedad cu ta pertenece na e sospechoso. E teniente, ken no a haya carga di nada, supuestamente a yama Srey Sina pa yud’e cu e disputa, cual polis a bisa a envolve asuntonan manera liña pa colga paña, mata di mango y espacio pa parkeer auto.
Video di camara di seguridad riba red social a mustra cu e sospechoso a mustra pa Long Lysong bay cerca dje na un luga net pafo di e bisti di camara, unda evidentemente el a tir’e. Despues por a mir’e back riba camara cu su pistol, mientras e otro victimanan a purba sconde bao di mesa, pero a ser persigui y tira.
Polis, ken a captura e sospechoso varios ora despues cu el a huy for di e sitio, a bisa cu el a confesa na e acto, bisando cu e tabata furioso cu Long Lysong tabata papiando fresco cune. Ademas di apelacion pa e castigo mas pisa pa e asesino, e incidente a resulta den un yamado pa limitacion riba posesion di arma.
