SAN NICOLAS – Valero a laga un gran cantidad di abest atras cu e compania a dump ilegal riba e tereno di refineria. Gobierno a obliga e compania Mericano pa limpia e dump aki, sinembargo awor ta mustra cu mas asbest ta wordo dera den e dump cu ta cerca di e casnan den Fort Heuvelstraat.
E trabou ta andando basta simannan caba. Na prome instante e habitantenan tabata pensa cu Valero ta limpiando e dump ilegal, pa motibo cu na 2006 a dera saconan cu asbest bou tera cual no a bay segun reglanan ambiental. Trahadonan ta deshaci di e sushi di asbest awor den container pa despues tapa nan cu santo.
E habitantenan tambe ta kere cu tabata trata di e saconan bieu so, sinembargo esaki no ta e caso. Bon Dia Aruba a descubri cu tin sushi di asbest riba tera cu Valero a dump eynan sin cu nan a tape. Y cu awor trahadonan ta haci e trabou aki. Un trahado ta conta cu el a cuminsa traha un luna pasa y a firma un contracto cu Citgo pa haci e trabou di limpieza di asbest.
Nos a puntra director di Refineria di Aruba, e compania estatal nobo cu ta doño awor di e refineria na San Nicolas con por cu un trahado di Citgo ta haciendo e trabou aki. Mientras gobierno y Valero a palabra cu Valero lo haci e trabou di limpiesa. E director Alvin Koolman ta bisa cu e no sa exacto con e ta hinca den otro pero cu porta Valero a palabra cu Citgo cu nan lo tuma e trabou over pa un cierto suma.
No a informa habitantenan
Siman pasa diahuebs, prome cu e inauguracion festivo di Citgo, habitantenan por a mira trahadonan den pañanan di proteccion. Ora nan a yama e refineria pa puntra kico ta pasando, nan no a haya informacion. Te awor niun a pone e habitantenan na haltura di e trabou di asbest, locual ta un rekisito conforme e Asbestbesluit. Departamento DTI cu mester vigila riba esaki, no a wordo poni na haltura di e trabou. Departamento di Medio Ambiente cu tambe ta encarga, tampoco. Sinembargo te awor niun a para e trabou, mientras nan tin e poder pa haci esaki. Te awor e habitantenan ta preocupa pa nan salud y ta keda den insiguridad.
No tin permiso
Un otro punto importante den e storia aki ta esun di permiso di Hindervergunning. Segun gobierno esun bieu di Coastal cu tambe tabata ta valido pa Valero. Pero manera Bon Dia Aruba a publica caba, e permiso ta bisa bon cla cu no por dump substancianan malo pa salud di hende, medio ambiente y bestia riba e tereno di e refineria. E otro punto ta cu e permiso aki no ta valido mas pa motibo cu e refineria a cera mas cu 2 aña. Y segun ley (Hinderverordening, articulo 15) mester pidi pa un permiso nobo. Tambe e actividad di e refineria a cambia ( en bes cu lo opera como refineria, lo opera como upgrader) y segun ley e ora e compania tambe mester pidi un permiso nobo.
Ora nos a confronta director Koolman cu e echonan aki, e ta contesta cu e no sa di e reglanan y ley ainda y lo bay check esaki. Ora a puntra si Refineria di Aruba mes no mester pidi un permiso pa haci e trabou e limpiesa awor, el a indica cu e compania estatal mes no ta haci e trabou pero otro companianan cu nan ta duna e trabou. Ora Bon Dia Aruba a mustra e director cu esaki no ta kita responsabilidad e compania como e dunado principal di e trabou, director Koolman ta bisa cu lo bay busca mas informacion riba esaki.
Ora nos a puntra dicon e Refineria di Aruba no ta di haltura di e reglanan y ley como cu ta un compania estatal, sr. Koolman ta indica cu tur cos a bay hopi leu y awor nan a cuminsa como cu awor oficialmente nan ta doño di e refineria.
Landfill
Nos tambe a puntra riba e ‘landfill’ cu gobierno a acorda cu Citgo. Asina pa prome biaha e refineria lo haya un dump legal pa sushi. Bon Dia Aruba a puntra director Koolman dicon Citgo mester un landfill y pa ki sushi. E ta splica cu esey ta cosnan cu ainda mester traha riba dje den detaya y lo wordo fiha den un ley (Landsbesluit) apart cu mester palabra cu Citgo ainda. E ley aki lo contene tur e exigencianan ambiental pa Citgo. E director ta splica cu e landfill lo bin banda di e dump ilegal di abest. Nos a puntra tambe kico Refineria di Aruba lo bay haci cu e sushi radioactivo y otro sushi toxico cu ta laga atras. Den acuerdo cu Valero, gobierno a palabra cu Pais Aruba lo tuma e responsabilidad pe limpiesa aki. Bon Dia Aruba a puntra director Koolman con nan ta bay deshaci di e sushi aki. “Nos no por dump esaki claro. Dado momento nos mester wak si nos por transporta esaki afo unda por wordo procesa den un forma adecua.”
