Asamblea Nacional (AN) lo a debati awe riba e informe di e Comision Permanente di Energia y Petroleo encuanto e falta di suministro di gasolin.
E parlamento lo discuti riba e informacion di e Blokenan Parlamentario di Aragua y Carabobo, encuanto e collapse di e Lago di Valencia y e consecuencianan pa e comunidadnan den vecindario.
Conductornan di vehiculo a forma rijnan largo na e stacionnan di servicio na Caracas dia 20 di september, pa por haya gasolin pa nan vehiculo.
E poblacion di Caracas a denuncia e iregularidad den suministro di gasolin, loke tambe ta reporta desde varios luna caba na otro estado di e pais y cu a bira mas grave, manera na Nueva Esparta, Merida y Tachira.
Relaciona cu e Lago di Valencia, habitantenan di sur di Maracay a comparti un video cu ta mustra e estado critico di e luga.
E escasez di combustibel, cu tabata manifesta su mes den interior caba, a yega tambe na e ciudadnan mas importante. Mientras tanto, e situacion financiero, e caida den produccion di crudo, y e caida den capacidad di produci combustibel na Venezuela mes, ta hibando empresa estatal PDVSA den direccion di un paralisacion. Pa basta tempo caba e pais mester importa gasolin y diesel pasobra no tin e capacidad pa produci esaki na e pais mes, ademas cu no tin crudo disponibel pa esaki. E importacion di como 200.000 bari pa dia di gasolin y 70.000 bari di diesel, na prijs di mercado internacional, y despues bendi na bolivar na e consumidor, cu no ta yega na mas cu un par di cen di dollar, ta consumi hopi divisa, di cual e pais tin insuficiente pa por realisa tambe importacion di otro necesidad grandi, manera alimento y medicina.
