Ayera diabierna Asamblea Nacional Constituyente a keda instala na Palacio Federal Legislativo, a pesar di e grave afirmacion di fraude den su proceso. Asamblea nacional constituyente di Venezuela, ta un organo cu poder ilimita, pa cambia ley y constitucion na Venezuela, y a ser eligi siman cu a pasa.

Ex-canciyer di Venezuela, Delcy Rodríguez a ser eligi pa aclamacion di tur hende presente.

Diosdado Cabello, lider chavista y asambleista a propone Rodriguez como presidente di asamblea constituyente di Venezuela.

Mientras tanto, diputado Julio Borges, presidente di Asamblea Nacional (Parlamento) a reconoce cu e salon, caminda ANC a instala su sede, ta di e poder ehecutivo, pero Borges a condena cu ta usa e espacio aki pa instala e fraude ilegal mas grandi cu historia contemporaneo di Venezuela a registra.

Borges y directiva di Parlamento a sigura cu guardia nacional a usa forsa y violencia pa tuma e salon eliptico, situa na edificio di Asamblea Nacional. Militarnan a habri e porta cu violencia, pa asina cuminsa cu preparacion di e acto di instalacion di constituyente na sede di palacio federal.

Nicolas Maduro y otro politico di oficialismo a declara cu e constituyente lo traha pa elimina “inmunidad parlamentario” di diputadonan. Tambe ANC lo interveni pa tuma e control di Fiscalia di Venezuela, caminda su presidente, Luisa Ortega Díaz a adverti e peligro cu e intencion di ANC di cambia ordenamento huridico ta representa.