Den cuadro cu proyecto AruTram cu a inicia den aña 2012, AruTram ta conta Bon Dia cu e proyecto ta andando hopi bon pero no por nenga cu ainda por mehora cierto aspectonan manera iniciativanan y ideanan nobo pa inspira e turistanan pa baha for di e tram y cana den caya.
AruTram ta agrega cu tin diferente trabao cu ta wordo haci caba y otro plannan den desaroyo pa promove e idea pa e turistanan baha for di e tram y bay cana den caya pero pa motibo tambe cu tin hopi otro desaroyo tumando luga den caya, esaki ta bayendo poco lento pero sigur. Esaki ta un proceso cu ainda ta andando y AruTram no por a realmente splica of duna mas detaye na kico exactamente lo ta e pasonan cu ta bay of mester wordo tuma pa logra e meta aki.
AruTram ta agrega cu simplemente si bo wak caba, djis pa e turistanan yega den caya ta yudando hopi.
Tur dia ta diferente y bo ta haya hende cu ta gusta core den e tram y mira bon prome cu nan baha specialmente si nan scucha of mira algun promocion andando. Ta trahando cu diferente comerciante tambe y segun AruTram esaki ta treciendo un efecto hopi positivo den caya.
AruTram ta splica cu locual sigur por mehora mas ainda ta e iniciativanan cu por tuma pa inspira e turistanan baha y mas cooperacion cu comerciantenan den caya pa bin cu mas idea y iniciativanan nobo pa yuda cu esaki.
E intencion principal di e proyecto aki tabata pa promove Downtown Centro di ciudad Oranjestad, e tiendanan y partinan cultural historico di ciudad cual ta brinda un ambiente unico den Caribe cu bo no ta haya mucho tampoco segun AruTram.” E turistanan ta haya esaki hopi atractivo, nan ta yega subi cu hopi confiansa y curiosidad. E experiencia di turista y publico en general riba tram ta hopi positivo cu 99.9% di biaha den e ultimo añanan aki” , representante di AruTram ta conta Bon Dia. E servicio di AruTram ta uno hopi amabel y respetuoso na publico segun AruTram y tin turista cu ya caba ta cumindando trahadonan di AruTram pa nan nomber. Ora di subi e tram bo ta wordo splica tur e reglanan apropiadamente y tin diferente chauffeurnan pendiente pa ta alerta na cualkier cos y guia e hendenan por ehempel pa keda sinta riba e tram pa motibo cu pa ley no mag di ta para riba e tram ora cu e ta core.
E trahadonan ta crea un dushi ambiente pa e turistanan
Bon Dia a papia cu Albert Figaroa kende ta un conductor di tram pa 4 aña caba desde e comienso di e proyecto. ”E ta un dushi trabao, mi no tin nada pa keha di dje. Cu e publico mi no tin problema mi ta echt encanta traha cu hende y duna informacion y cu mil amor mi ta haci esaki tur dia ” sr.Figaroa ta bisa. Sr. Figaroa ta agrega cu tin hende cu ta baha for di e tram y tin cu kier wak rond prome cu nan dicidi di baha of cumpra algo. ”E posibilidad di mehoracion semper tey pero nos no por coy e hendenan pa nan man y obliga nan bay baha for di e tram anto cumpra cos. E ta un proceso cu nos ta traha cune y nos tog ta asegura di haci nos best pa e hendenan pasa bon y disfruta di e experiencia” , sr.Figaroa ta splica.
