“Nos ta trahando bay bin cu algun plan pa traha hunto cu e comerciantenan di den caya pa con nos por propaganda nan mas hopi hunto cu nos,” Sr. Theo Croes, director di Arubus/Aruparking a bisa. Nan ta trahando riba un plan y tambe pa haci un modificacion den full e sistema cu realmente e sugerencianan di e comerciantenan ta wordo tuma den consideracion.
Tur critica cu a wordo entrega Aruparking ta evalua esakinan, segun e director. Tur locual cu haci uzo di dje pa por drecha y mehora e servicio pa ta na beneficio di tur hende. E idea ta pa tur yega hunto na algo, pa e ta un exito sea pa e comerciantenan como Aruparking.
Haci propaganda hunto a wordo bisa mas o menos 2 pa 3 siman pasa. Arubus/Aruparking a sinta cu Camara di Comercio, pero a puntra Sr. Croes si a sinta cu tur comerciante den caya. Segun e director, dos siman pasa tur comerciante a wordo invita pa sinta hunto.
Diferente opcion
Aruparking tin diferente opcion di cual na prome instante Sr. Croes no tabata kier a menciona nan. Segun su persona, e motibo cu e no kier a menciona e opcionnan ta pa motibo cu nan lo kier a sinta prome cu e comerciantenan pa mira si nan ta bay di acuerdo cu e proposicion cu nan kier trece dilanti. E director ta menciona cuater opcion cu lo bay tin pa loke ta trata e plan pa haci propaganda.
E prome opcion ta cu manera den e mashinnan mes tin un screen. Asina cu hende yega pa pone cen den dje, lo sali bisa cu tal tienda tin un baratio, e tin un oferta cu ta popup na momento cu bo ta hinca bo cen. E otro ta e recibo cu hende ta haya patras di dje tin e propaganda. Probablemente pa nan haci propaganda hunto, den e sentido cu tin algun tienda ta haci esaki caba cu si e cliente cumpra mas cu 35 of 50 florin, nan ta paga e ticket. Kiermen como comerciante nan ta tuma e ticket for di e cliente y ta debolbe e cliente e placa cu nan a paga sea ta 1 florin of 2. E otro propaganda cu Aruparking ta ofreciendo nan ta por ehempel ta den e tram, unda cu ta haci propaganda pa e tiendanan den caya grandi y e ta limita.
“Manera ma bisa nos tabata tin reunion cu doño di tiendanan mes. Tur a wordo invita door di Camara di Comercio, pero mas o menos 30 tabata t’ey presente,” segun e director. Probablemente esunnan cu ta interesa eseynan lo traha cu nan. E opcionnan cu Sr. Croes a menciona no a wordo treci dilanti ainda na e comerciantenan. E ta sigui indica cu el a menciona e puntonan aki no oficialmente, pero internamente nan lo elabora riba e opcionnan aki pa despues presenta nan cerca e comerciantenan. Tin mas punto cu nan kier bin cun’e. Prome cu nan kier a bay reunion cu nan, Arubus tabata tin e puntonan aki caba pa bin cu nan. E idea ta pa yega hunto pa ta beneficioso pa ambos partido. Aunke cu esakinan no ta soluciona e problema pe comerciantenan, pero segun e director, cada cos cu nan trece ta yega parti na e solucion, of parti na e mehoracion.
Duna miho prijs
Hopi comerciante ta puntra dicon Arubus no por duna nan un miho prijs pa nan por cumpra cierto espacio of pakete pa nan cliente cu ta yega na e luga. A puntra Sr. Croes si esaki ta algo dificil. “E ta dificil, pero nos ta evaluando cierto di e cosnan ey,” e ta indica. “Nos ta ocupa interno. Esey ta un preocupacion di nan. Tabata tin e otro preocupacion di un doño di luga cu ta bay para leu y ora sali atardi cu placa etc. etc. Tur esey nos ta trahando riba dje. Esey nos tin un solucion pe,” segun e director.
Sinta cu comerciantenan
Ora cu a bin cu e parkeer meternan, no a sinta cu e comerciantenan prome. E comerciantenan ta sintiendo e efectonan aki, di cual comunidad mes ta bisa pa nan sali for di caya grandi pa asina nan por sigui yega y no mester paga pa cu esaki. A puntra Sr. Croes, dicon no a sinta hunto prome cu a introduci e parkeer meter. E director ta indica, cu loke e comunidad ta bisa pa nan sali for di caya ta haci efecto. Den e mesun reunion cu a wordo teni, comerciantenan a trece e punto aki dilanti. Practicamente tin hende ta boicotia e proyecto, kiermen cu nan ta para pafo unda no mester paga. Pero awor tin opcionnan, segun Sr. Croes. Si bo kier para leu bo no ta paga y si bo kier para cerca bo ta paga y bo ta para mas cerca pa yega e tienda.
Haci investigacion
Un investigacion a wordo haci pa un compania contrata pa DOW, segun e director. E ta sigui indica cu e investigacion a wordo haci den Oranjestad completo. E investigacion cu a wordo haci no ta pa motibo di tereno priva, sino cu na prome instante esaki tabata den man di DOW. Gobierno a pasa Arubus e proyecto aki, e ta bisa. E preocupacionnan cu tin awo, no ta preocupacionnan cu por a wordo mira prome, Sr. Croes a indica. E preocupacionnan a bin na momento cu el a wordo introduci.
