Dianan pasa Aruparking, Arutram y Arubus a nombra Edwin Mohamed como director nobo y el a comenta cu e companianan aki ta confronta retonan financiero pero tambe e lo kier trece un cambio cu un maneho di vision nobo pa cada un di e compania aki.

Ayera Aruparking a trece dilanti un informacion pa recorda comunidad con e servicio ta trahando y tambe a señala cu pa ley semper mester a paga ora di para den vaknan blanco, unico cos ta cu no por enforsa e pago pa via di maneho di gobierno pasa unda no tin mag di uza klem, loke ta nifica cu e parti aki ainda ta vigente.

Mientras nan ta trahando den un fase nobo, tambe nan a splica cu nan lo kier trece pa e comunidad un campaña di conscientisacion y informacion pa nan por conoce cambionan cu lo bin. Por ehempel, nan lo bay bin cu varios zona di parkeo cu permiso, zona di parkeo paga y zona di parkeo gratis, cu di e forma aki ta ofrece posibilidad pa tur esunnan cu ta desea di yega centro di ciudad logra haya parkeo.

Orario di parkeo paga: 9 or te 3 or, weekend y despues gratis
Aruparking ta recorda henter comunidad cu orario di parkeo paga cu ta vigente te proximo aviso ta di 9or di mainta te 3or di atardi di dialuna pa diasabra. Esaki ta encera solamente vaknan blanco, vaknan geel ta solamente pa esunnan cu tin permiso di parkeo paga pa luna y pa un area determina.

Asina mes, nan a señala cu e persona cu a paga un permiso pa vak geel den zona A no por haci uzo di vak geel na area B, den e caso ey e mester haci uzo di vaknan blanco, ta importante pa comunidad y bishitantenan por parkeer nan auto na un luga cu ta permiti, cumpliendo cu e reglanan di parkeo den centro di ciudad.

Di mesun manera, nan a adverti cu e personanan cu ta para nan auto den vak geel (sin cu tin permiso), para den dos vak blanco, para unda no tin vak pinta, para riba acera of pega na un skina, Aruparking lo por tuma pasonan y kita e auto aki for di e area, asina como tambe esaki por tuma luga na cualkier ora y no desde 9or te 3or di atardi so.

Di loke ta trata e tarifanan di parkeo, Aruparking a recorda cu ta Afl. 0.50 pa 15 minuut, 1 florin pa 30 minuut y 2 Florin pa 2 ora den siman y pa 3 ora riba diasabra. Tanto patras di Botica Oduber como na e parkeerplaats di e stacion di bus di Arubus tin 3 ora gratis di parkeo, pero mester registra e number di vak.

Ademas, Aruparking como parti di e campaña di conscientisacion pa comunidad kier cu tur persona por parkeer nan auto den luga estableci cumpliendo cu e reglanan y asina e hende no lo haya ningun tipo di molestia.