No ta desconoci e proceso dificil cu e compania estatal di transporte publico Arubus ta pasando aden. Nan ta den un situacion financiero preta cu un flota di bus no mucho di gaba y un servicio deficiente.
Segun minister encarga Chris Romero (MEP) riba nan presupuesto actual nan a pone pa bin cu un flota nobo di busnan pa brinda miho servicio. E ta sostene cu transporte publico mester ta mas social posibel y sigui brinda un tarifa mas social. A pesar di e crisis financiero di pais Aruba, minister Romero ta kere cu gobierno por inyecta placa pa subsidia un tarifa social. “E no ta un suma grandi adicional.” Pero mester bin cu un miho maneho pa mas hende por haci uzo di Aruba e ta trece mas entrada, esaki ta e mandatario su pensamento”.
Incertidumbre
Mientras cu Aruparking cu a wordo introduci tambe cu e proposito pa genera entrada pa Arubus su maneho ta den un incertidumbre, Minister Romero a indica cu nan ta un gobierno di coalicion, y aunke e compania aki ta cay bou su maneho, tin diferente aspecto cu mester tene cuenta cu nan pa motibo cu tin 3 partido den gobernacion.
Nan a forma un comision pa trece solucion pronto den dos pa tres siman, specialmente riba e situacion di Aruparking. E no ta descarta cu lo bin bek cu e sistema di klem auto. Pero prome cu cualkier cambio lo wordo introduci, nan lo informa tur hende adelanta riba nan y tambe riba nan consecuencianan.
Minister Romero a bisa cu nunca el a yega di protesta pa kita klem. Aunke su partido y actual prome minister si a yega di manifesta contra klem auto. “Chris Romero nunca a bisa cu mi ta drenta kita klem.” Den e caso aki e ta considera cu mester ta realistico tambe.
P’esey e ta considera como un acto iresponsabel e forma cu ex prome minister Mike Eman (AVP a dicidi pa kita e klem. Tampoco nunca el a pone su decision preto riba blanco, solamente el a duna autorisacion.
Tin un comision cu a keda instala pa evalua tur situacion pa bin cu e miho sugerencia entre otro si e sistema di klem auto lo bin atrobe.
Nan tambe ta scuchando awor keho for di e comerciantenan di Playa cu haci momento cu a haci e regla di parkeer mas flexibel, no tin luga mas. El a afirma cu pronto lo bin solucionnan den beneficio di tur hende.
