Despues cu e ley di parkeermeter a drenta na vigor tin hopi desaroyo cu tin hende contento y otro no, pa cual aki a acerca vocero di Arubus y Aruparking Sr. Sannin Daou pa splica tocante e desaroyonan. Sr. Daou ta splica tambe tocante di e mapa di Aruparking.
“Nos tin un mapa caminda unda henter nos zona ta identifica . Tur local cu ta riba e mapa aki ta cay den nos zona. Mester bisa cu un incidente cu a pasa patras di e area di Port of Call ta lo siguiente. Na momento cu un auto tabata para riba acera, a klem e auto mirando cu nos ta publica tur caminda cu bo no por para riba acera y pa uza solamente vak pa parkeer. Pues unabes cu e auto a para riba acera ya ta un motibo pa pone klem di biaha. Locual a resulta ta cu e personanan a acerca Aruparking y bisa cu unda cu nan a para ta un tereno priva. Na e momento ey Aruparking no tabatin e informacion ey pues a bisa e personanan pa keda pendiente mientras cu ta busca mas informacion. Tambe si nan tin prueba di esaki por duna Aruparking, cual lo yuda e investigacion .”
Investigacion y destruccion
Aruparking a bay haci estudio / investigacion y a haya sa cu berdad esey (unda e personanan a para) ta un tereno priva. Sinembargo por a compronde cu e persona a bay bek na sitio di su auto y a kibra e klem pa nan por a bay. “Si nan lo a duna Aruparking un 10 minuut mas, lo a kita e klem for di e auto sin ningun problema. “Tabatin casonan cu klem a wordo poni cu no mester a wordo poni, y nan a wordo kita. Lamentablemente e personanan aki a dicidi pa kibra e klem cual ta algo cu no ta bon.” A puntra Sr. Daou kico a bay robes den e situacion aki. Sr. Daou a bisa cu e sitio cu e situacion a tuma luga ta den zona di Aruparking pues p’esey Aruparking a actua y a klem e auto.
Kico ta bay haci den futuro
“Mester bisa cu ta purbando di tur dia haya tur informacion completo, pues ta haciendo estudionan mas extenso aworaki. Ta haciendo esaki desde cu a ripara cu tin cierto caminda cu a wordo indica como zona di Aruparking cu no ta cuadra, pues a cuminsa busca mas leu pa ta hopi mas sigur pa e situacion aki no ripiti.”
Terminando Sr. Daou a bisa cu bou di ningun circunstancia ta recomenda ningun hende pa kibra klem. Ora cu bo bay over na kibra un klem, bo mester corda cu bo ta bay den un caso di destruccion. Pues bo ta kibrando un propiedad cual tin su consecuencianan cun’e. Mester bisa cu si pone un klem cual no ta cuadra, si nos por haya e prueba ta kita esaki di biaha. “Nos sa cu unda cu tin trabou ta wordo haci, un fout por wordo haci tambe, pero bou di ningun circunstancia nos ta conseha hende pa tuma medida manera kibra un klem”, Sr. Daou a termina.
