Na Friends of God Bookstore director di Arubus/Aruparking Teo Croes a tene conferencia di prensa pa papia di tur locual cu ta haciendo pa mehora e servicio di Aruparking y tambe comercio. El a expresa cu Aruparking tin un compromiso cu comercio y kier sostene comerciantenan den caya grandi mas cu por. A anuncia diferente cambio di tarifa pa parkeer tambe.
Segun Channela Maldonado di Aruparking recientemente Aruparking a lansa un campaña di Back to School hunto cu comercio di caya grandi cu ta promove caya grandi. Aruparking acerca tur e tiendanan unda cu Aruparking ta controla y unda pues mester paga pa parkeer. Desde inicio varios compania a uni na e campaña y Friends of God tabata un di e prome nan tambe. “Clientenan cu bin haci compras den caya grandi por identifica e tiendanan cu ya a join a base di un sticker cu a wordo traha special pa e campaña, e sticker lo ta pega na porta di tur cu ta participa den e campaña. E campaña ta encera cu cada compra di 35 florin e clientenan lo haya 1 florin bek, pues e cliente lo paga 34 florin pa su compras. Cada compra di 50 florin e cliente lo paga 48 florin pa e compra y lo haya un descuento di 2 f;lorin. Pa compra di 100 florin of mas, e cliente por pasa na Aruparking cu e recibo y asina haya un Smartcard cu tin 10 florin riba dje. Pa asina nan por sigui haci uzo di dje pa haci compras den caya grandi. Cu e campaña hunto cu comercio aki. Aruparking ta spera cu por sigui promove caya grandi y sostene comercio local. Pa menciona algun compania cu ya ta forma parti ta: Sport Caribe, Collins, Dolce & Gabanna, Sams, Boolchands entre otro.”
Desde inicio di e campaña siman pasa diabierna, ya a haya hopi bon reaccion di comerciantenan segun Sra. Maldonado y ti mas di 100 Smartcard cu a wordo parti gratis na clientenan cu a gasta mas di 100 florin na e tiendanan den caya grandi y a pasa Aruparking pa reclama esaki. No a calcula cuanto persona ta desea cu e campaña lo atrae. Pero si ta spera cu esaki lo ta hopi y cu lo duna hopi Smart Card. E campaña tin un duracion di 3 luna, pues lo termina na september. Despues di e 3 lunanan aki lo bin cu un otro campaña, cu lo ta pa e tempo di december. Banda di esaki tambe lo saca un ganado cada luna, cu lo haya e placa di su compra bek, te na e balor di 350 florin, basa na unda el a cumpra.
Teo Croes: “Ta mira crecemento den e campaña y ta wak e importancia pa bay dilanti hunto cu caya grandi, atrayendo mas hende cu ta posibel.”
Tarifanan nobo
Banda di esaki tambe ta bay cuminsa cu despues di 1 ora, bo tin espacio di 15 minuut prome cu un sancion cay. No ta asina si cu bo tin 15 minuut gratis prome cu mester paga. E momento cu bo paga y bo tempo a vence, e ora ta bay tin 15 minuut extra cu den e 15 minuut ey no lo bin boet. Tambe a wordo introduci cu en bes cu ta bay paga 2 florin pa 1 ora y mey, el a bira 2 florin pa 2 ora, y riba diasabra 2 florin pa 3 ora.
Tambe lo tin parkeer gratis na dos area, pues hendenan cu kier cana un tiki lo por para patras di Botica Oduber y tras di Arubus. Eynan lo bira 3 ora parkeer gratis, e cliente mester registra na e mashin manera cu lo a haci pa paga, eynan e ta haya e slip cu ta indica 3 ora gratis. Si kier keda para pa mas cu 3 ora, lo mester paga despues di e 3ora gratis pa e espacio, Sr. Croes a splica. E minimo ta keda 50 cen pa 15 minuut, 1 florin pa mey ora y 2 florin pa 2 ora. E idea di e parkeer gratis ta pa atrae mas hende den caya, cual tin bon resultado. Den weekend e ta hopi yen y esey awo tin e opcion pa hendenan cu no ta worry para poco mas leu y cana. E decisionnan aki a bin despues di tene diferente reunion cu comerciantenan pa purba yega na otro. Tin compromiso pa bay dilanti hunto cu comerciantenan y pa e situacion ta win win, pues na rais di esey ta haciendo tur e cambionan aki. Tambe parti mainta e proximo dos lunanan aki, lo no bay cobra entre 7or cu 9’or di mainta. Ta haci esaki e prome dos lunanan aki pa test, pa wak kico ta funciona miho pa comerciantenan y wak kico ta atractivo pa e cliente. “Comerciantenan ta bisa si cu tin mas accesibilidad den caya grandi cual ta e meta di Aruparking. Mientrastanto lo keda evalua y keda reuni cu comerciantenan pa wak ki feedback tin y wak ki reto mas tin y mira kico por mehora.
Aruparking ta haciendo hopi pa yuda comerciantenan, a puntra Sr. Croes si ora ta sinta na mesa ta trece dilanti tambe locual cu comerciantenan mes por haci pa atrae mas persona na nan tienda. El a bisa cu esey a wordo treci dilanti den un “brainstorming” si, pero no ta bay den e area ey, como ta nan area. Nan conoce nan producto y nos ta trata locual cu nos por den nos area pa yuda nan yega na locual cu nan benta mester yega. E no ta facil pero ta yegando hopi bon hunto. E campañanan tabatin hopi bon reaccion y ta sinti cu ta hopi mas cera cu e comerciantenan,” Sr. Croes a bisa.
Tram y auto den caya
Ainda tin hopi hende ta pensa cu e solucion pa mehora e situacion den caya grandi, ta pa haci esey posibel pa auto por pasa, manera cu e tabata antes, pa por lo menos algun ora. A puntra Sr. Croes si esaki ta algo cu lo por bin den futuro. El a bisa cu Arubus, Aruparking y Arutram no tin problema cu e peticion aki pa stop e tram algun ora. Sinembargo e situacion di habri e caya bek ta den man di Infra Team cu gobierno, el a termina bisando.
