Aruparking a yama un conferencia di prensa pa publica ultimo desaroyonan pa loke ta e parkeer meternan den cual Teo Croes director di Arubus/Aruparking ta bisa cu mas y mas hende ta uzando parkeervak pa para auto. “Mas y mas hende ta haciendo uzo di e parkeervak nan. Tin e tendencia cu ta mustra cu ta subiendo cu mas o menos 1000 transaccion pa siman for di inicio te cu aworaki. Ta mirando tambe cu ta mas bishitante haciendo uzo di e parkeervak nan tambe.”
E cantidad di transaccionnan cu tin pa siman ta representa e cantidad di ticket cu e mashin a saca solamente. Ainda no tin un bista riba e cantidad cu esaki ta representa den placa exactamente. El a sigui splica cu hopi hende ta comenta cu ta mira e parkeervak nan bashi, pero ta pa motibo cu tin locual cu ta yama turn over (fluho), no ta mira e espacio yen constantemente. “Un hende no ta para 10 ora na e sitio.” A mira cu berdad na comienso tabatin hende cu ta resisti contra esaki pero esaki a bira menos.
Segun Sr. Croes e parkeerwachter nan no ta duna un servicio autoritario solamente sino pa duna servicio na comunidad den e sentido cu den diferente area tin menos problema cu auto. Varios biaha e parkeerwachter nan a evita cu hendenan ta horta den auto di otro. “Na un ocasion a gara un hende den un auto y nan a yama polis etc. Tambe un parkeerwachter a tene un adicto cu tabata causando problema den un tienda cu cliente ora cu el a perde cabes, nan a tene te ora cu polis a yega.” Sr. Croes a enfatisa cu esaki no ta parti di nan funcion, pero e ta duna un sentido di siguridad na e pueblo. E idea tras di e proyecto ta pa por duna caya grandi mas accesibilidad y pa evita e peliger cu ta bin ora cu hende para riba acera y den skinanan.
Reunion
Dos siman pasa tabatin un reunion cu KVK cu mas o menos 30 doñonan di tienda den caya grandi den cual diferente punto negativo entre otro a bin dilanti. Tambe ta den plan pa traha mas cu e comerciantenan den caya grandi pa con por propaganda nan mas hunto cu Arubus. Tambe ta haciendo ful un modificacion den e sistema unda cu e exigencia cu nan tin ta wordo tuma den consideracion.
“Critica tin semper, pues locual cu ta haciendo aworaki ta evalua tur esakinan y locual cu por uza pa drecha y mehora un servicio na beneficio di tur hende ta wordo haci pa e ta un exito pa tur hende,” Sr. Croes a bisa.
Situacion tereno priva
Ultimo dianan medionan di comunicacion tabatin diferente storia di hendenan cu a haya klem pa motibo cu nan a para riba acera of tereno cu lo ta priva. Sr. Croes a splica cu acera no ta tereno di ningun hende. “Bo por pasa riba e berm bay riba bo tereno. Oficialmente e mester ta baha pa e ta legal como bo tereno, pues bo tereno por ta patras di e acera esey ta di bo pero no e pida acera. Si bo ta riba acera esaki ta wordo sanciona.”
Parkeerwachter nan ta autorisa
Tambe Sr. Croes ta mustra cu e parkeerwachter nan ta autorisa pa tur caminda cu ta den zona di Aruparking, den caso cu un auto ta fout para, pa klem of touw. Cu esaki e kier a clarifica e situacion.
A pesar di esaki hopi hende ta yama polis constantemente ora cu nan haya nan mes den un situacion cu un parkeerwachter. Aruparking a yama polis na diferente caso, na momento cu un klem a wordo kibra. Pero hendenan tambe ta yama polis ora cu nan no kier acepta e ley di Aruparking y nan ta sinti cu e persona di Aruparking no ta un autoridad. Pa cual Sr. Croes ta bisa cu esaki tin di haber kisas cu tin falta di informacion cerca di e personanan aki, sinembargo no por stop un persona di yama polis. Aruparking ta keda actua di acuerdo cu ley. “E leynan a wordo publica diferente biaha y tambe riba “Afkondigingsblad”, pero por publica esakinan atrobe si tin necesidad ainda di esaki,” Sr. Croes a termina.
