Arumil cu inscripcion habri te 18 di mei

Durante open dag di Marinierskazerne Arumil tabata ricibiendo inscripcion pa hobennan por forma parti di e cuerpo uniforma. Inscripcion ta habri te 18 di mei.

Den un entrevista cu Richard Kelly, luitenant prome clase na Marinierskazerne, ta conta nos con importante e ta pa hobennan jong haya e disciplina, compromiso y oportunidad ora di forma parti di Arumil. E solicitacion habri ta conta pa hobennan di 18 aña te cu 25 aña di edad. “Nos kier pa nan bay den bon caminda, manera polis of brandweer.”

“Nos kier pa nan bay den bon caminda, manera polis of brandweer.”

Mirando cu na Marinierskazerne hopi hende jong ta bishita, Arumil a dicidi di habri un tent unda ta duna informacion riba kico bira parti di Arumil ta encera, pero alabes ‘un bon momento pa hende por solicita y nan ta wak tur cos di biaha kico ta encera servicio’.

Esaki lo ta un bon oportunidad pa hobennan interesa pa solicita, sr. Kelly ta conta, pasobra desde par di luna pasa ta uzando un maneho nobo pa asina percura cu personanan cu a sirbi por haya un ayudo pa haya otro carera ora ta dicidi di sali di Marinierskazerne.

E maneho aki ‘te ainda no ta ful cla’, sinembargo sr. Kelly ta splica cu e ta firma y nan ta structurando esaki concretamente. “Esaki ta pa un persona cu a pasa den nos training por haya un trabou como polis, brandweer, etc, pero tambe si no tin espacio den sector priva.”

”Ora bo pasa den carera di militar esaki pa hopi hende pafo di e rango aki ta mustra cu bo tin un disciplina y bo ta serio, cual tin un balor grandi ora hende sa cu bo ta un persona para bon den bo sapato.”

Pa basta tempo Marinierskazerne ta organisando e open dag. Ki tempo esaki a cuminsa no ta conoci, pero pa sr. Kelly kende tin 21 aña den servicio, te hasta den su tempo tabata organisa esaki.

”E meta ta pa laga hende di pafo wak kico ta pasa ki den un poco y kico e trabou di marina ta encera. Hopi biaha nos ta tras di muraya y bo no ta wak kico ta pasa. Esaki ta algo cu mi ta kere ta importante si pa Aruba, si bo wak bon con hopi hende ta bin y con tempran nan ta yega pa haya luga.”