Director general di AruGas, sr. Roberto Geerman, a declara na Bon Dia Aruba cu no ta wordo premira un aumento riba e prijs di cilinder di gas.
Durante e seminario cu a wordo organisa pa celebra e di 75 aniversario di AruGas, oradonan manera Profesor Edward Glab y Dr. Eduador del Valle a presenta den nan disertacion un panorama general riba e desaroyo di e negoshi di oil y gas. Sr. Geerman a indica cu den e presentacion aki a wordo mira cu si e prijs di combustibel ta keda asina “nos ta mantene un prijs stabiel”.
Sr. Geerman a bisa cu esaki ta e mensahe cu a sali fei e seminario aki, caminda a wordo papia entre otro riba suministro, explotacion, prijs y opcion di gas den nos region y Aruba. Venezuela ta aparece riba e mapa di paisnan den nos region cu reserva di gas, y e ta un pais bisiña di nos cu ta opcion pa suministra gas pa nos isla, ya cu transporte y poco demanda di gas ta haci su prijs mas halto.
Opcion suministro
Sin embargo riba e opcion aki, director general di AruGas, sr. Roberto Geerman a declara na Bon Dia Aruba cu Venezuela lamentablemente a pasa di ser un pais exportado pa un pais importado di gas propano. El a señala cu antes nos tabata haya producto fei Venezuela (Bajo Grande), pero pa mas cu 11 pa 12 aña, Venezuela a cambia pa bay den e region di Trinidad of U.S Golf.
“Pa hopi hende ta dificil pa kere. Asina e economia a swing cu e refinerianan ta produci cada bes menos y Venezuela ta concentra mas di exporta crudo”, el a declara. Ta asina cu aworaki un pais productor di petroleo te hasta nan ta importa gasolin, ya cu eficiencia di nan refinerianan cada dia ta bahando.
