Faltando par di dia mas pa scol habri, Arubus ta den pleno preparacion pa loke ta trahamento y renobacion di carchinan Student Smart Card pa studiantenan. Ta haci peticion na comunidad pa bin purba regla esaki prome cu scol habri otro siman.

Ultimo por a mira rijnan largo di hende para pa regla esaki, y Arubus kier a informa cu no ta necesario pa bin personal pasobra bo por haci tur cos online.

Channela Maldonado di Arubus NV ta confirma riba comienso di renobacion di Student Smart Card di Arubus pa studiantenan nobo. E servicio pa haci esaki online ta obtenibel y Arubus kier encurasha tur studiante pa haci esaki online, pa asina evita filanan largo cu ta actualmente pasando na Arubus su oficina principal na Sabana Blanco, mirando cu scol ta cuminsa e siman aki.

Mester bay riba e website di Arubus.com, meld pa esaki, despues bo por pasa busk’e na Arubus pariba of pabao, of na oficina di Aruparking. A pone mas luga disponibel pa busca e carchi pa asina evita filanan largo. E proceso di haci e online ta: cu bo ta registra, bo ta saca un selfie di bo mes, bo ta haci bo transferencia y den dos dia bo por pasa busca e carchi na e localidad cu bo a pidi p’e.

Pues no tin mester di bin te na Arubus mas manera antes, por haci esaki via bo telefon y aplica tur cos. Ta sumamente facil pa aplica mester djis sigui e pasonan riba e website, upload bo comprobante cu bo ta bayendo scol sea un rapport of comprobante di pago di schoolgeld, sea pa scol priva of gobierno. E prijs a keda mesun cos, 15 florin pa renobacion di Student Smart Card y bo ta load e cu stapnan di 5, 10, 15 etc,. No tin un deadline pa saca e carchi aki pero Arubus ta encurasha tur hende pa haci esaki prome cu scol habri otro siman.

Si ta desea pasa personal, por pasa pues na oficina principal di Sabana Blanco pa haci esaki entre 8’or di mainta te cu 3:30 di atardi. Un Student Smart Card tin su bon beneficio manera tarifa reduci pa cada trip AWG. 1.50 durante oranan di scol [5:00am – 11:00pm], solamente por wordo uza pa studiante. Arubus un bes mas ta pidi pa no laga te na ultimo momento y aplica.