Director di Arubus, Teo Croes a admiti cu e situacion di e compania ta cada dia mas preta; ya cu e espacio financiero ta masha limita pa atende cu  nan gastonan. Ademas un di e gastonan cu ta pesa mas den nan presupuesto tin di haber cu salario y obligacion di nan personal of trahadonan.

Encuanto e estado di e busnan Arubus, sr. Croes a considera cu inicialmente esaki tabata un argumento cu sindicato STA a uza pa bin cu nan accion diabierna ultimo cu den fondo ta busca pa atende cu asunto di schaalering di salario. Ya cu un bus no ta sali sin DTI a keur.

Situacion financiero
Encuanto aspecto financiero Croes a bisa cu e compania ta confrontando hopi perdida ya cu no mester lubida cu e servicio di transporte pa muchanan di scol y pa nos pensionadonan ta wordo subsidia.  Pero e gasto cu ta mas costoso ta salario di e contracto colectivo di e trahadonan (CAO).

Sr. Croes a bin cu cifra caminda solamente den salario nan tin un gasto di 9 miyon y nan presupuesto of subsidio for di gobierno ta 6.7 miyon florin. “Kiermen esaki por duna bo un bill kico e ta.”El a menciona cu ora cu el a drenta 5 aña pasa, e averahe di salario di un chauffeur cu tur componente tabata 6.668 florin. Nan a logra bah’e te cu 5.900 y pico. Mientras cu nan tarifa tabata 2.50 fls mientras cu nan costo di operacion tabata 5.55 florin.

Director di Arubus a señala cu nan a haci diferente manera pa aumenta nan entrada entre nan a bin cu un departamento di Marketing,  tambe nan a bin cu un plan pa genera mas na garashi, etc.. Pero un factor cu ta afectando existencialmente  Arubus ta cu nan ta perdiendo pasahero dilanti nan competencianan, esta e autobusnan. For di 2012 te aworaki Arubus a perde 1 miyon pasahero debi na diferente factor cu director na e momento ey no kier a bay den dje.

Mientras cu Aruparking, el a bisa cu a wordo crea cu dos meta principal, esta pa trece siguridad pa e peaton debi na e autonan cu tabata para ariba acera. E dos meta tabata pa crea accesibilidad pa e clientenan na caya grandi. E dos meta a wordo logra; pero e otro meta tabata ta e parti financiero. Segun nan business plan a wordo indica cu e sistema aki di meternan di parkeer lo a  genera cierto ganashi cu lo bay pa Arubus pa inverti den ekiponan y bus nobo. Pero debi na e adaptacion y cambio cu constantemente a wordo haci cu e orario y cobramento di Aruparking cu nan no a logra e meta di produci ganashi.

Estado di e busnan
Sinembargo e ta admiti cu varios factor a hunga un rol pa Arubus su servicio ta manca pa falta di bus den bon estado. Sr.Croes a indica cu den diferente reunion el a yega di papia cla riba e problema aki, caminda un factor cu ta daña nos bus lihe ta e condicion di nos careteranan, ya cu e busnan no ta wanta e caminda. Pero tambe e busnan aki ta wordo forsa mas ya cu nan a core 400 mil kilometer den tres aña loke un bus normal ta core den seis aña. Y na 200 mil kilometer e busnan aki mester wordo overhaul y Arubus cu tampoco nan tin e “tempo” pa haci’e, y p’esey nan ta wordo deteriora lihe.

Pero el a bisa cu absolutamente e situacion actual di nan busnan ta atenta contra e siguridad di nan pasaheronan.  E bus Internacional ta core 20 ora pa dia locual ta haci cu nan por confronta cualkier daño of problema riba careteranan.

Te hasta diabierna nan tabatin  total entre 16 pa 15 bus para ya cu e bus no ta apto pa sali, nan no ta lag’e core riba nos careteranan, segun sr. Croes.  Pero cualkier eventualidad lo por sosode riba caminda como cualkier otro vehiculo di motor cu pa ehempel nan airco ta daña, etc..

El a duna un panorama no alentador  di e situacion di e flota di 15 bus nobo cu Arubus a adkiri na 2014,  caminda tres bus para di cual un a kima y  dos ta accidenta cu no por drecha mas, un di nan e chauffeur a fayece.  Di e 12 cu ta resta , tres ta coriendo y nan ta sacando otro bus pa brinda servicio.  Pero nan tabatin problema cu pieza pa e bus for di e agencia. Tambe nan a bay busca piesa na otro luga y diamars ultimo nan a haya nan locual lo permiti pa cuater bus lo wordo drecha pa sigui core riba nan rutanan.