Recientemente ariba rednan social como tambe den medionan di comunicacion por mira cu tin algun sucedido lamentabel ta tuma luga den e busnan di transporte publico di Arubus NV. Den bista di tur e sucedidonan aki y reaccion di pueblo ariba rednan social, Sr. Sannin Daou di Arubus, hunto cu vocero di Cuerpo Policial di Aruba, Sra. Liliana Rasmijn, a tene un conferencia di prensa pa asina clarifica Arubus su posicion pa cu esaki.

“Nos kier pa ta sigur y duidelijk cu Arubus no ta bay tolera ningun tipo di violencia mas den nos busnan, ni verbal ni fisico, bao di ningun circunstancia esaki lo wordo acepta,” Daou a remarca.

El a splica cu manera ya ta conoci tin bastante situacionnan fastioso ta tumando luga den e busnan di Arubus ultimamente y esaki ta pasando den manera di violencia verbal of fisico y di parti di Arubus, el a enfatisa, nan no ta di acuerdo cu esaki y nan no ta bay acepta esaki.

Daou a sigui splica cu pa Arubus e punto di prioridad ta seguridad di no solamente e trahadonan, pero tambe di e pasaheronan cu ta inclui di muchanan di scol te cu hendenan grandi, adultonan mayor, pensionadonan cu ta haci uso di transporte publico tur dia.

El a agrega cu e tipo di casonan asina di violencia ta pasando den tur bus y no solamente den busnan di scol, referiendo na e caso di dos hoben cu a bringa formalmente y a laga e bus sushi na sanger apenas dos dia atras. “Nos kier sigura pa tur hende compronde cu Arubus no ta bay acepta tipo di cosnan aki mas,” el a bisa.

Na mesun momento el a subraya cu na momento cu tin tipo di situacionnan asina, sea agresion verbal of fisico, tuma luga den bus, Arubus ta bay over na cuminsa schors e personanan aki mesora, manera cu a haci recientemente u otro pasahero cu a bira agresivo cu e chauffeur di e bus. El a indica cu ta bay stop e tipo di personanan aki di subi bus y dependiendo di kico e agresion ta, e schors por ta pa un tempo indefini y e persona no por subi bus nunca mas.

“Nos kier pidi, por ehemplo na e mayornan, pa papia cu bo yiu si bo yiu ta usa bus, pasobra hopi biaha den casonan cu bo no por usa bus bo no tin manera pa e yega scol, pero si e ta forma parti di cualkier tipo di cosnan asina, e lo wordo stroba di subi y no lo por yega scol mas y e lo cay riba e mayornan pa zorg pa e yega scol,” Daou a señala.

El a indica cu e adultonan tambe mester compronde cu e transporte publico ta e manera cu hopi di nan yega trabao of move rond, y na momento cu Arubus prohibi nan di subi bus pa motibonan di violencia, e ta bay bira hopi mas dificil pa e persona y probablemente lo costa hopi mas placa.

Sr. Daou a anuncia na mesun momento cu Arubus conhuntamente cu Cuerpo Policial ta bezig cu un campaña cu lo cuminsa pronto y na unda nan lo bay actua cu man hopi duro riba tur tipo di casonan asina.

“Conhuntamente nos lo bay atende cu tur e tipo di cosnan aki. Nos t’ey pa duna servicio, nos kier dun’e lo miho posibel, pero mas cu tur cos nos kier pa tur hende ta sigur den nos busnan, nos kier pa tur hende sinti sigur y pa e motibo aki mesora nos no ta bay acepta ningun acto fuera di luga,” el a remarca.

Vocero di Cuerpo Policial di Aruba, Liliana Rasmijn, tambe a enfatisa cu di partido KPA nan no ta bay tolera loke pasando actualmente den e busnan di Arubus.

“Loke ta pasa cu nos hobennan, esakinan ta actonan hopi lamentabel y p’esey mes nos ta para hunto cu e departamento di Arubus cu ta transporte publico, cu te’y pa e seguridad tambe y nos ta traha hunto aworaki pa evita e situacionnan aki,” Rasmijn a indica.

El a subraya locual Sr. Daou a splica, tocante e consecuencianan pa esnan cu comete actonan violento den busnan, y a remarca cu Cuerpo Policial ta para tras di Arubus. El a señala cu den casonan cu tin di haber cu bringamento, actonan cu ta bay contra di ley, polis lo actua.

“Nan tin nos blessing caba pa ki ora cu nan ta sinti, e chauffeur ta sinti cu e situacionnan ta bay for di man, nan ta yama Cuerpo Policial di biaha y lo tin un patruya presente,” el a enfatisa.

Rasmijn a splica cu di parti di Cuerpo Policial, locual nan ta haciendo for di aworaki caba, ta duna hopi charla, acerca e hubentud y splica nan e consecuencia di ora cu nan a haya nan mes involucra den problema cu ley.

El a sigui splica cu prome cu scolnan caba semper tin patruyanan di polis ta pasando rond pa evita cu e actonan aki ta pasa. Den un situacion na momento cu tin bringamento y ya tabatin un polis cerca, nan por actua cu mas rapidez, saca personanan aki y stop e bringamento.

El a haci un yamado tambe na e mayornan pa papia cu nan yiunan cu ta haci uso di transporte publico pa evita cu tin bringamento den busnan. “Abo como mayor papia cu bo yiu, splik’e e consecuencianan ora nan haya nan mes involucra cu ley. Ora nan yega cerca nos ya e ta un proceso caba y nan ta bay haya un carchi. Dus e ta importante pa boso como mayor, como responsabel, splica nan,” el a bisa.

El a remarca cu Cuerpo Policial t’ey pa e orden publico y tambe pa e seguridad di cada persona na Aruba, tur esnan cu ta subi bus pa bay traha of bay scol, y cu kier yega na e luganan aki bon y kier yega nan cas bon tambe.

Den caso cu un situacion di violencia presenta y e chauffeur pidi e persona pa baha for di bus, pero e persona no kier haci esaki, Sr. Daou a splica cu e prioridad di Arubus ta e seguridad di su pasaheronan y e chauffeurnan, na momento cu un persona nenga di baha e politica ta cu e chauffeur ta yama polis y ta atende cu e persona.

Den e caso cu durante cu polis ta na caminda, e persona envolvi dicidi cu e kier baha, nan ta habri e porta pa e bay.

“Loke ta duel nos ta cu na momento cu un cos asina sucede cu nos para e bus, nos tin cu corda cu tin mas hende den bus cu ta bay yega nan destinacion mas laat, pero mayoria di biaha nos tin cu pensa semper riba e seguridad prome cu tur cos,” Sr. Daou a resalta.