ORANJESTAD – Minister di Transporte, sr. Otmar Oduber a laga sa cu Arubus lo haya pronto un flota di busnan nobo y bon condiciona. Lo tin un total di 6 pa 8 bus cu ta yegando nobo otro luna.
Despues cu Arubus a purba cu bus fabrica na China y International cu –segun e mandatario- no a resulta malo, pero e ta kere cu miho nan ta paga un tiki mas, pero haya un calidad cu lo resulta mas duradero. P’esey nan a opta pa bay bek na e marca di bus Volvo y Marco Polo.
El a haya cu e inversion aki ta necesario mirando cu Arubus tin varios bus basta bieu, y esunnan nobo cu a bin recientemente cu nan ta coriendo un 30% mas hopi cu e averahe di loke e busnan den pasado tabata core. Pues e desgaste di e busnan nobo aki ta mas halto cu e busnan anterior. Nan intencion ta di “rehubenece” e flota di bus di Arubus den un periodo di dos pa cuater aña.
E mandatario a laga sa cu e tabatin e honor di introduci e prome bus cu airco na Aruba. Tambe e prome bus electrico cu tabata un proyecto piloto di seis luna. Pero nan a dicidi otro y e proyecto aki no a continua y e compania a bay cu su bus electrico tambe fei di Aruba.
El a recorda cu e tabata e prome mandatario di transporte cu a bin introduci bus cu airco prome cu esey e tipo di bus aki no tabata brinda servicio riba nos isla. Nan a pone como maneho cu considerando e temperatura halto cu nos ta maneha na Aruba, no ta un luho pa tene airco den transporte publico.
El a indica cu den e flota di Arubus si e ta conta e cantidad di busnan cu gobierno a cumpra nobo durante e ultimo 6 aña, no tin comparacion cu esunnan cu a wordo adkiri prome. Minister di Transporte a declara cu aworaki sikiera tin un plan di inversion pa regularmente renoba e flotanan di e compania nacional di transporte publico.
