Ayera pa 10’or y mey di mainta hues pa medio di un caso sumario entabla pa gerencia di Arubus a dicidi e suerte di e accion cu e trahadonan di e compania estatal di transporte representa pa sindicato STA a cuminsa for di oranan di madruga.

Den su sentencia hues a dicidi cu e trahadonan mester stop nan accion; y nan ta prohibi  pa blokia e salida di e busnan. Pero igualmente hues a manda pa ambos parti pa papia riba nan diferencianan; y esaki a tuma luga na oficina di mediador di Gobierno.

Protocol
Ayera atardi a keda firma un protocol cu intermediacion di mediador Anselmo Pontilius cu a pone punto final na e accion di ayera na Arubus. Sr. Pontilius a bisa cu pa yega na e acuerdo of  protocol aki e partidonan a discuti por lo menos  cuater punto principal cu ta concentraparticularmente entre otro schaalering di salario, busnan deteriora y  e rijvergunning. Pa yega na e protocol aki tambe nan a papia cu e director di Departamento di Transporte Publico (DTP), locual a permiti cu e trahadonan a renoba trabou no solo basa riba e sentencia di hues; sino a base di e protocol cu a keda firma.

El a menciona cu actualmente e compania y e trahadonan tin un contracto colectivo vigente den cual un di e puntonan cu ta den discusion ta e introduccion di un sistema nobo di schaalering. Mediador a bisa cu nan recomendacion ta pa preveni e tipo di accion aki pa motibo cu Arusbus ta un compania demasiado importante pa nos comunidad cu ta ricibi por lo menos 6 miyon florin di presupuesto nacional.

Pero no tur cos a caba cu e firma di e protocol aki, ya cu e partidonan, tanto STA como gerencia  di Arubus y tambe e minister encarga, lo sigui reuni regularmente pa atende cu e puntonan pendiente entre nan e estadonan di e busnan. Ta  keda un responsabilidad grandi di Arubus  riba siguridad di e hendenan cu nan  ta transporta locual a keda un punto primordial di e acuerdo aki. E situacion di e bus deteriora of den mal estado ta grandi na Arubus. Di un flota di 15 bus cu ta esunnan mas nobo cu a bin na 2013,  casi cuater aña pasa so, 13 di nan ta daña caba.

Comentario di sindicato
Presidente di STA,  Diego de Cuba a bisa cu nan a firma e protocol aki pa trece paz laboral atrobe den Arubus. Pero e acuerdo ta condiciona na cierto rekisitonan cu nan tin cu cumpli cu ne, specialmente di banda di gerencia di Arubus. El a declara na Bon Dia Aruba cu e accion aki tabata debi cu e trahadonan di Arubus tabata coriendo bus sin rij vergunning riba caminda publico. Nan lo por a confronta problema cu e funcionarionan di DTP, ya cu nan por para e chauffeurnan aki y baha for di bus si nan no tin e permiso aki.

Bus accidenta y pega candela
El a bisa cu e situacion aki a scala ya cu diahuebs atardi ora cu nan a reuni cu gerencia di Arubus su director a bira “arogante den contra di e sindicato”.  Diahuebs anochi, despues di e reunion aki, STA  a haya mandato di e trahadonan pa pone Arubus plat. Nan ta haya hopi iresponsabel di core un bus den condicion deplorabel considerando cu bida di hendenan ta keda na peliger. Tambe sr. De Cuba ta haya iresponsabel di parti di gerencia di Arubus di laga e bus aki subi caya den mal condicion, poniendo den peliger bida di hende; y sin cu e chauffeurnan aki tin nan rijvergunning. Incidente a yega di pasa cu busnan cu a accidenta y cu a pega candela debi na nan mal estado, caminda e chauffeurnan ta pone nan bida na riesgo y esun di nan pasaheronan.

“E cosnan aki no por continua asina ey. Nos no por keda bay na gerencia cada bes." E ta haya cu ta deber di e hefe di garashi di Arubus y tambe di e chauffeur pa controla e busnan, prome cu nan sali tur mainta, y esaki no  ta tumando luga tampoco. Pa tal motibo STA a organisa hunto cu e trahadonan e accion aki, te ora cu nan por haya un solucion definitivo y concreto di parti di gerencia di Arubus y indirectamente di Gobierno.

Igualmente e sindicalista a pidi su disculpa na pueblo en general pa cu e situacion aki. El aindica cu nan no por a haya otro alternativa, despues di un “cantaleta” di mas 8 luna cu nan ta warda pa un solucion pa nan problemanan. Tambe e ta haya cu e mal estado di e busnan di Arubus ta haci cu nan no por competi brindando un bon servicio cu e autobus chikito, loke ta pone e compania aki den un situacion di instabilidad; ya cu e autobus ta garando tur e pasaheronan y nan ta mas barata.

Arubus
Director di Arubus Theo Croes a bisa cu unabes cu nan no a reuni diahuebs  tardi y cu trahadonan bou nan sindicato a bay den accion, nan a dicidi di bin cu un caso sumario. E ora  hues a dicidi cu e trahadonan mester bay traha bek a base di locual nan a bay den accion cu ta e condicion di e busnan; y tambe hues a prohibi e blokeo. Encuanto e estado di e busnan , sr. Croes a bisa cu nan a demostra na corte cu un bus no ta core si DTI no ta keuring. Igualmente el a laga sa  cu den ora di merdia -a base di un palabracion cu DTP- a wordo traha un carta unda ta keda garantisa cu si algo pasa cu e chauffeur pa via di e rijvergunning,  Arubus ta responsabel pe.

E situacion di nos caretera ta un factor cu tin tanto bus “nobo” mayoria di nan daña caba, sr. Croes a bisa. Pero e busnan aki a core 400 mil kilometer den tres aña loke un bus normal ta core den seis aña; pues esaki ta otro causa cu nan ta deteriora lihe. Pero tambe na 200 mil kilometer e busnan mester wordo overhaul y Arubus no tabatin e “tempo” pa haci’e, segun sr. Croes. Pero e no ta haya cu e situacion aki no ta atenta contra siguridad.