Manera ya caba Bon Dia Aruba a publica den un entrevista cu representante suplente di Hulanda na Aruba, Sr. Vincent Storimans, eleccion pa Parlamento Europeo ta tuma luga dia 6 di juni. En conexion cu esaki, ayera mainta durante un webinar cu representantenan di Hulanda den islanan di Caribe Hulandes y demas coleganan, a brinda informacion mas detaya ariba e proceso di registracion y importancia di eherce e derecho di voto aki.

Durante e webinar, Storimans a cuminsa na subraya e importancia di eleccion Europeo. No solamente pa e 27 pais miembro di Europa, pero tambe pa e paisnan den Caribe Hulandes.

“Mi ta kere cu esaki ta hopi importante y ta util tambe, pasobra si bo ta un habitante di un di e paisnan miembro, bo ta haya un invitacion automaticamente, pero den e relacion aki bo mester haci mas esfuerso pa bo inscribi na e eleccion,” el a indica.

Pa esnan cu no tin conocemento tocante kico Parlamento Europeo ta y e importancia di e eleccion di esaki, cual tambe tin un efecto pa Aruba, el a splica cu Parlamento Europeo ta e parlamento transnacional mas grandi na mundo, cu 720 miembro, cu ta wordo eligi directamente pa e residentenan di e 27 pais miembro di Union Europeo.

Esey ta nifica cu cada cinco aña, e 720 miembro di Parlamento Europeo ta wordo eligi directamente pa e residentenan di Union Europeo.

Pa loke ta Hulanda, el a sigui splica cu Hulanda por scoge e 31 miembro di parlamento, y den esaki ciudadanonan Arubiano cu nacionalidad Hulandes por participa y eherce nan derecho di voto. Cu 31 miembro Hulanda ta e di shete pais mas grandi den e tereno aki. Alemania ta e pais di mas grandi cu 96 miembro y e pais mas chikito ta Malta cu 6 miembro. “Asina bo por mira cu Hulanda cu 31 miembro por haci hopi cos na Bruselas” el a enfatisa.

Storimans a indica cu Parlamento Europeo su funcion ta un colegislacion, locual ta nifica hunto cu e 720 miembro e legislacion ta wordo traha, y segun el a enfatisa, e legislacion for di Bruselas of Strasbourg ta birando mas importante y pues mas y mas ley ta bin for di Europa.

“Ta trata di asuntonan cu ta hopi importante pa nos tur. E ora ey bo ta papia di medio ambiente, seguridad, migracion, asuntonan relaciona cu economia y ta importante pa loke ta trata di haci, bo voz wordo scucha. Pues, pa bo sa cu bo miembronan di Parlamento Europeo, cu nan ta wak pa bo interesnan y cu nan t’ey pa bo tambe,” el a resalta.

Pa loke ta e proceso di voto, manera ya caba menciona, e ultimo dia pa ciudadanonan di nacionalidad Hulandes por registra pa por vota den e eleccion aki ta 25 di april y ciudadanonan mester tene cuenta cu algun rekisito simpel, pero importante, cu no por falta pa por registra y vota.

Storimans a splica cu tur persona cu ta den exterior, pues afo di Hulanda, mester registra cu e municipio di Den Haag.

Asina tur hende cu ta desea di nombra for di exterior, ta registra nan mes na e municipio di Den Haag, cu ta esun cu ta administra tur esnan cu kier vota for di exterior.

“Manera nos a bisa caba, esey ta nifica cu bo mester haci un poco mas esfuerso. Pues bo mester inscribi pa esaki,” el a remarca.

Tur ciudadano cu inscribi pa vota e biaha aki, of cu a yega di inscribi y vota caba pa eleccion di Parlamento Europeo, mester inscribi e un biaha so y e municipio di Den Haag lo tin e registracion aki. Despues di e registracion e votador ta ricibi un e-mail y despues nan ta ricibi un prueba di esaki.

Storimas a indica cu pa Aruba, Corsou y Sint Maarten e representacion na Oranjestad, Willemstad y Philipsdorp ta funciona manera un post di voto. Pues e documentonan di voto pa eleccion di Parlamento Europeo dia 6 di juni, lo wordo manda na e oficinanan di representacion si e ciudadanonan a registra dia 25 di april na un minuut prome cu mey anochi, ora di Hulanda, of prome cu e fecha ey.

E proceso ta tuma luga via e website stemmenvanuitdebuitenland.nl, ey riba por haya tur informacion y rekisito y despues di e registracion e ciudadanonan ta keda den e registro di e municipio di Den Haag. E documento di votacion ta wordo manda pa e oficina di representantenan y e ciudadanonan por eherce nan derecho di voto te hasta un siman prome cu e dia di eleccion.

Na tur oficina di representacion ta bay tin urna di votacion na unda e votadornan por entrega nan voto, esaki ta warda te na momento cu mester haci conteo oficial. Despues di e conteo di e votonan, ta manda e informacion pa e municipio di Den Haag cu ta publica esaki riba nan website.

“Esey ta un proceso publico, asina ta cu e momento cu nos ta bay haci un pre-opening, pues si hopi voto ta drenta, nos mester habri un tiki mas trempan cu e dia mes. Esakinan ta procesonan publico pa interesadonan, cu ta ciudadano of hende di e medionan di comunicacion, y nos lo anuncia tambe ki dia nos lo haci esaki. Asina tur hende tin e oportunidad pa ta presente, pa observa y pa mira cu tur cos ta bon y na ordo,” Storimans a subraya.

Sra. Nathalie Pilck, project manager pa eleccion na e municipio di Den Haag pa votadornan cu ta biba afo di Hulanda, a enfatisa e importancia di registra pa por vota den e eleccion di dia 6 binidero. El a clarifica cu si un persona ta registra como votador pa eleccion di Tweede Kamer, esaki no ta nifica cu automaticamente e ta registra pa e eleccionnan pa Parlamento Europeo. “E eleccionnan tin diferente criteria pa cada eleccion y p’esey e registracion ta estableci pa cada eleccion. Pues esey sigur ta un punto di atencion,” el a indica.

Pilck a trece pa dilanti e cifranan, provisional, pa loke ta e registracion te cu aworaki di votadornan pa eleccionnan aki. Pa Aruba tin 1122 votador registra, Corsou tin 1259 votador registra y na Sint Maarten 196.

“For di Den Haag nos ta un par di kilometer leu pero nos ta spera cu nos servicionan nos ta yega hopi cerca di e habitantenan di Corsou, Aruba y Sint Maarten, pasobra nos ta kere cu ta hopi importante pa nan por tin un voto tambe. Cada voto ta conta y Hulanda ta vota riba 6 di juni pa e eleccionnan pa Parlamento Europeo 2024,” el a subraya.