Gilian Boekhoudt, un studiante di 24 aña di edad, a reporta cu su mama Arubiano, kende tabata kedando pa tres luna cerca dje na Leiden, a desaparece diasabra ultimo.
E mama, Mira Florez Sanabria di 54 aña di edad, a sali diasabra mainta rond di 11or pa bay haci compras den centro di ciudad. Segun Boekhoudt, e parada di bus ta net pafo di su cas. Sinembargo, ora Sanabria a dura mucho largo, Boekhoudt a purba di yam’e riba telefon. “Despues di un minuut a contesta telefon, pero niun hende a bisa nada. Despues nan a cera telefon bek.”
Boekhoudt, kende tin un aña studiando na Leiden, no ta kere cu su mama boluntariamente a keda sin bolbe despues di haci compras. El a bisa cu su mama no ta papia Hulandes ni Ingles, y cu e lo a bolbe sigur. Desde cu su mama no a bolbe, Boekhoudt a cuminsa busca. “Mi por cana y busca riba caya, puntra persona. Pero Hulanda ta asina grandi.”
Pa Polis, no ta trata aki di un desaparicion urgente.
Boekhoudt ta spera di por haya su mama mediante datonan di su carchi di transporte, OV-chipkaart. Pero NS, e proveedor di transporte, no mag di duna e informacion aki na niun persona otro cu polis. Boekhoudt no sa con largo esaki por dura.
Riba rednan social ta compartiendo e yamada pa yuda busca Sanabria. E studiante a declara cu no tin hopi otro manera pa activa persona pa yuda busca su mama. “Mi ta biba apenas un aña na Leiden. Mi no conoce hopi hende akinan.”
Sanabria a nace dia 30 di januari 1965. E tin cabey bruin scur cortico, wowo bruin scur, y 1,48m di estatura. E tabatin bisti un leggings preto, sapato preto, jas blauw y tabatin cune un tas preto cu ros.
Ta suplica cualkier persona cu por tin informacion di e paradero di Sanabria pa tuma contacto cu Gillian Boekhoudt +(31) 685-84-3279 of tuma contacto cu Polis di Leiden na 0900-8844.
