Nigel Maduro, ken ta un activista di medio ambiente y conservacion climatico cual a bira conoci debi na su manera di trece dilanti su defensa pa medio ambiente y naturalesa, recientemente a ser scogi pa Caribbean Climate Justice Leaders Academy pa asina representa Aruba na COP29 – United Nations Climate Change Conference cual ta bay tuma luga na Baku, Azerbaijan na november.

Pa esaki, Bon Dia Aruba a tuma contacto cu Maduro pa asina conta un tiki tocante esaki na unda el a expresa cu esaki ta un proceso den cual el a uni na un academia cual tin di nomber Caribbean Climate Justice Leaders Academy, esaki ta trata di un programa cu ta ofrece e oportunidad unico na hobennan defensor di medio ambiente y lidernan comunitario den Caribe pa siña tocante husticia climatico, pa nan interactua cu esnan encarga di crea e politica global y asina promove accion climatico.

“Di miles di aplicante basicamente, nan a scoge rond di 50 persona di diferente isla di Caribe y mi a keda den e top 8 di studiante di academia cu ta bay representa nan isla cu tur gasto pago pa nos por asisti, e ta un honor y un privilegio pa mi por asisti y representa Aruba. Cu esaki mi por duna un voz na e situacion cu ta pasando, cada biaha cu mi papia na Aruba hendenan no ta tuma mi na serio, awor cu mi ta bay COP29 y representa Aruba na United Nations e ora ey mi ta bira un representante internacional cu hopi hende ta reconoce cu ta papia di cambio di clima,” Maduro a expresa.

Entre su experticio, Maduro a forma un red Unifica di Husticia Climatico cu otro representantenan climatico y defensor socio ambiental di e Caribe Hulandes, a defende pa adaptacion y conservacion di clima na Caribe Hulandes cu un mayor consenshi riba e crisis climatico y ambiental na Aruba, a realisa tayernan di Desaroyo Socioecologico Sostenibel, tambe tocante Activismo Ambiental Interseccional y otro tipo di activismo manera e ta bin haciendo cu su protestanan pacifico denomina Beach Party.

“Beach Party ta un evento cu mi ta purba di haci pa trece comunidad hunto y nos ta hacie specificamente dilanti di e hotelnan cu ta den construccion riba diadomingo pasobra mi ta ripara cu hopi local no ta bay riba lama mas pasobra e beachnan ta yen di turistanan, den esaki tambe nos ta siña e hende, nos ta duna workshop di sostenibilidad of maneho di desperdicio, entre otro, cu musica y asina mustra e capacidad di nos mesun hende y siña kico ta pasando na Aruba tocante sostenibilidad of tambe cu turismo, ademas e ta un protesta pacifico cu nos borchinan y nos pone nan den santo y crea un area specificamente pa local pero nos tambe ta invita turistanan pa siña di nos,” el a bisa.

Su punto ta pa reclama lama y tera, pa mustra resistencia na e perdemento di tera cu ta pasando sistematicamente manera e ta sigura.

Pa mañan diadomingo 1 di september lo tin un ultimo Beach Party na Baby Beach for di 11or di mainta, esaki ta e ultimo protesta pacifico y esun di mas grandi cu lo tuma luga pa motibo cu den area ta bay construi e hotel di mas grandi y tambe pa motibo cu e mester concentra y prepara su mes pa su biahe pa Azerbaijan na november.

Tocante reaccion di comunidad, el a comenta cu e ta hayando reaccionnan di banda y banda, positivo debi cu un hende ta realisa esaki pa hobennan defende naturalesa y purba di trece comunidad hunto y negativo unda nan ta bis’e “mi no sa pakico bo ta haci esaki cu no ta sirbi pa nada” mientras tanto, e meta ta pa hendenan compronde kico ta sucediendo manera el a finalisa.