Arubiano na Hulanda ta haci denuncia contra Ministerio Publico di Aruba

Ricardo Thomas a duna di conoce su preocupacion y mal contento na unda e ta sigura cu abuso ta tumando luga cu su persona y Ministerio Publico di Aruba tin un persecucion contra dje.

Den un entrevista online cu e medio local Noticia Impacto, Thomas a splica cu tin hechonan cu ta sucediendo den Cuerpo Policial di Aruba cu no ta bon y cu minister di Husticia Rocco Tjon tin cu tuma accion den e caso aki debi cu e no por wanta e situacion aki mas.

El a conta cu seis luna aproximadamente, su mama cu ta biba na Aruba a haya un carta dirigi na Thomas unda ta señala cu e mester tuma contacto cu urgencia cu warda di polis na Santa Cruz: “M’a yama nan, puntra kico ta pasando y kico ta e problema pasobra mi ta na Hulanda. Nan a bisa mi cu mi tin cu bay Aruba pa un interogacion,” el a bisa.

Pero den esaki, Thomas a sigura cu e no sa e motibonan di pakico esaki ta tumando luga y e como ciudadano tin derecho di haya sa kico nan tin contra su persona “pasobra a mi sa cu mi no tin nada di debe na husticia y si mi tabata culpabel di algo mi no lo yama warda di polis pa puntra nada y mi tin mi mama na Aruba. Mi no ta bay haci mi problema, nan problema.”

El a trece dilanti cu un funcionario di inicialnan L.P., miembro di Cuerpo di Polis, no por conta Thomas kico Ministerio Publico tin contra dje debi cu e no tin e informacion ey. Nan bisa na Thomas cu e tin cu bin Aruba pa por resolve e caso aki.

“Mi ta haya tambe cu ta un abuso cu si ami ta yamando boso y puntrando boso pa seis luna pakico boso mester di mi y boso no ta bisa nada ta pasobra ta riba un wega boso ta,” el a bisa.

Igualmente, el a señala cu e tin su abogado na Hulanda y el a bis’e pa tuma contacto cu e autoridadnan na Aruba pa wak e situacion y dependiendo di esey nan por lanta un kortgeding debi cu e kier sa cu den ley tur persona tin derecho di haya sa pakico nan ta buscando e persona.

Tambe, el a trece dilanti cu nan por yam’e pa haci un interogacion via video yamada manera ta ser haci den algun casonan y esey ta algo cu Thomas no ta compronde: “dicon pa algun casonan si nan ta trata VIP y pa nos cu ta hendenan normal, central, no tin esey pa nos,” el a sigura.

Thomas ta sinti preocupa debi cu e tin su mama na Aruba y e kier bin pa wak’e y despues autoridadnan por lag’e deteni pa algo cu e no sa.

Den pasado, Thomas tambe a haya su mes envolvi den otro situacion cu Cuerpo di Polis tocante un supuesto abuso policial na Aruba na unda e ta sigura cu e caso ey a keda cera y e no a tende mas nada di esey.

El a declara cu el a manda un carta tambe dirigi na halto comisario di Cuerpo di Polis di Aruba di Aruba, Ramon Arnhem, pero Thomas no a haya un contesta di e carta ainda.

“Mi ta sinti manera mi caso no ta bal nada, caminda tur hende ta central, tur hende tin derecho di haya husticia y mi ta kere cu si Ramon Arnhem ta integro, mi ta kere cu e mester a responde pa caba na mi carta pasobra hasta mi a yama su secretaria y te awe nan no por bisa mi nada. Ami ta sinti cu nan tin algo contra mi pasobra mi ta bin den prensa y mi no tin miedo. Nan ta busca un manera di silencia mi pero ami no ta silencia pa ni un hende, ni pa polis, ni pa recherche y si mi tin cu bay den guera legal, mi ta bay den guera legal,” Thomas a manifesta.

Thomas den su declaracion ta afirma cu e casonan asina ta pasando hopi na Aruba, na unda polis y miembronan di recherche “ta haci y deshaci y ni un hende no ta sali den prensa, pero ami desde cu cada rato cu nan ta busca mi un problema mi ta sali pa nan y mi ta mustra nan cu mi no tin miedo. P’esey un par di hende na Aruba mester para duro contra nan y mi ta spera tambe e minister Rocco Tjon tuma e cos ki na serio.”

Den un carta cu Thomas a haya supuestamente manda pa L.P. ta indica na Thomas si e por bin y presenta urgente na Recherche Bureau na Santa Cruz.

E situacion aki manera el a comenta, tin tur su famia preocupa y hasta Thomas a señala cu nan a yega di bay te warda di Santa Cruz pa purba di haya informacion tocante e caso aki pero tampoco e famia a haya un contesta di kico ta pasando.

E ta considera cu esaki ta algo personal cu autoridadnan tin contra su persona debi cu el a bisa publicamente nombernan di miembronan di recherche y polis riba rednan social unda e ta comenta cu “mi kier pa pueblo sa con mi lo ta bisa, con corupto e cuerpo policial ta, e recherchenan, nan a abusa hopi di mi y nan kier pa mi firma declaracion cu a mi nunca lo a bisa, nan kier obliga mi y mi a mustra nan cu mi no ta firma nada.”

Na e momentonan aki, Thomas cu su abogado ta bezig riba kico nan por haci y si nan por lanta un kortgeding debi cu e abogado mes a bis’e con por ta posibel cu e tin seis luna wardando pa nan bis’e kico nan tin contra dje. E ta afirma cu e tin tur prueba, e-mailnan, combersacionnan graba debi cu e ta di opinion cu ora e ta pleita un caso, e tin su derecho.

“E cos ki ta un abuso y e abusonan aki tin cu stop y tin cu yega na su tempo. Mi a manda carta tambe na Prome Minister demisionario Mark Rutte di Hulanda pa nan sa tur e cosnan aki cu ta pasando,” el a bisa.

Thomas cu ta biba na Hulanda tin su mesun compania na unda el a sigura cu nunca el a haya su mes confronta cu problema eynan, cu esaki ta pasa solamente na Aruba y cu den e sentencia cu el a haya dos aña pasa “eynan hues a bisa cu Ministerio Publico a usa informacion ilegal contra mi tambe. Esaki ta un persecucion di Ministerio Publico cu e recherchenan,” el a finalisa.