Diabierna mainta tabatin un accidente unda un Rubiano tabata envolvi, como pasahero, cu a resulta den lesionnan pisa cu a yega na consecuencia di morto pa e hoben di 30 aña.
Segun fuente 24ora.com, a accident a envolve 1 auto so, cual a dal contra un luz na cant’i caminda. Durante ora tempran, banda di 5’or di mainta, e chauffeur tabata core riba Putterweg ora cu a perde control y a dal contra un luz.
Tanto e chauffeur como e pasahero tabatin 30 aña di edad y mester a hiba ambos hospital pa trata e lesionnan causa pa e accidente. Despues di par di ora a bin haya sa cu e pasahero tabata Giovanni Croes, kende despues di bay hospital na Maastricht, a fayece pa via di e lesionnan cu el a haya durante e accidente.
Polis, segun e fuente, no a indica detayenan di e accidente, bisando cu ‘tur esey ta wordo investiga’. Un condolencia profundo pa e famia y amigonan di e fayecido.
