ORANJESTAD – Aruba ta un pais di hende amabel y beachnan espectacular. E industria di turismo ta e base principal di e economia, di un forma of otro tur hende ta depende di dje, y durante e ultimo 50 aña, e industria di turismo a pasa pa desaroyonan grandi cu te ainda tin espacio pa haci di esey algo miho.

Durante un entrevista cu Bon Dia Aruba a haci cu Susana Romero, Program Officer di Aruba Certification Program, el a splica cu e programa di certificacion tin como obhetivo principal pa crea y desaroya un conocemento di e industria di turismo y di Aruba mes.

E programa a cuminsa bou iniciativa di Oficina di Turismo, AHATA, na aña 2011. E idea tabata cu si economia ta drey rond di turismo, pa promove informacion corecto y consistente di e isla na tur persona cu traha directamente den e industria, hende cu traha na hotel, restaurant, companianan cu ta haci tour y tambe por ehempel e taxistanan.

Romero a comenta cu tur persona mester conta e mesun informacion. E contenido di e training ta basicamente e historia di Aruba, su cultura, su hendenan, historia di turismo, con el a desaroya durante tur e añanan, y tambe con lo por desaroya den futuro, como tambe e elementonan di servicio excelente. El a bisa cu nan ta enfoca riba e importancia di e bishitante, pero tambe di e rol di cada un persona cu ta participa na e programa di certificacion, con e ta impacta e bishitante su experiencia durante nan estadia riba nos isla. Romero a splica cu tur esey e programa di certificacion ta presenta den un tempo di dos siman. Prome nan ta haci un recorido di e isla, y e otro dia ta di teoria.

El a comenta cu e obhetivo ta pa motiva cada persona cu ta traha directamente den industria di turismo, pa motibo cu nan lo por haya demotivacion pa via di haci e trabou tur dia. Ademas, e parti di kico Aruba ta ofrece na bishitantenan, Romero a bisa cu den e curso nan ta bira consciente, y si nan ta motiva y consciente, nan ta transmiti esey bek pa e bishitante. Tambe Romero a duna di conoce cu Authentic Aruban Service ta algo nobo cu nan a introduci aña pasa. Aruba tin un manera unico di duna e servicio den comparacion cu otro destinacion. Den e servicio autentico nan a califica nuebe balor cu ta hancra den e rijs di e historia di Aruba, nan yama ‘Zjeito’ y esey ta consisti di un palabra bieu den e idioma cu tin diferente significado, entre nan, ‘ta algo autentico di bo’. Aunke e palabra ta chikito, esey ta nifica hopi.

Romero a bisa cu ACP lo kier transmiti na e Arubianonan nobo cu a bin emigra y haci Aruba nan cas, e balornan ta: Amor, Celebra Union, Libertad, Autenticidad, Orguyo, Carisma, Conserva y Creatividad.
Romero a comenta cu e idea ta cu tur hende ta bon bini pa por registra y participa den e curso, pa asina por ta miho capacita y representa Aruba plenamente cu informacion corecto y cu conocemento.

Tambe el a expresa cu aña 2019, ACP lo kier haci e prome sesion di ‘Programa di Excelencia di Aruba pa Managers’, cual ta diseña specialmente pa introduci e managernan cu ta traha directo cu waiternan, camarero, bell boy, entre otro, informacion corecto di Aruba su historia, cultura y naturalesa. Manera Romero a bisa, “Arubiano mester reconoce e importancia di conserva locual ta haci e isla algo unico”, e comunidad ta amabel cu tur e bishitantenan, e toke unico ta wordo representa den e programa como Aruba su Zjeito, y esey ta e secreto di ken e hende di Aruba ta, y e servicio cu ta ofrece pa tur e bishitantenan.