Ayera pa mas o menos 5’or di marduga, e team di aresto y team di atraco a haci un entrada hudicial na un cas den Kaya Karko na Corsou, en conexion cu un ladronicia cu violencia y morto, cu a tuma luga dia 7 di mei ultimo.
Ta asina cu e entrada hudicial a tuma luga na dos luga; uno ta un cas situa Robekkistraat y den Kaya Dodo Palm y tabata dirigi riba violacion di ley di arma di candela.
Durante di e investigacion, e oficialnan a haya y confisca dos (2) auto y articulonan cu ta importante pa e investigacion.
Ta trata di detencion di un dama naci na Aruba di inicial T.Y.T.R. y 20 aña di edad y e homber J.N.H., di 21 aña di edad, naci na Corsou. Ambos sospechoso a presenta dilanti un Fiscal Auxilia cu a ordena nan encarcelamento pendiente di mas investigacion.
Caso
Polis a presenta na un compleho di apartamento den area di Schelpwijk pa un ladronicia cu violencia.
Patruya cu a presenta na e sitio a constata cu tabatin un homber drumi abou den su cas cu herida di bala, y no ta duna señal di bida y cu tin un otro homber cu kap na cabes. For di un investigacion preliminar cu polis a realisa na e sitio, a resulta cu dos homber di nacionalidad Asiatico a yega cas y nan a wordo sorprende pa cuater (4) homber cara tapa.
Na e momento ey a start un confrontacion entre nan, y un di e hombernan aki a ricibi un kap na su cabes. Despues un di e sospechoso a kibra un porta di un di e apartamentonan, y a los un tiro dirigi riba un homber Hulandes Europeo cu tabata paden di su cas, pa despues e sospechosonan a huy for di e sitio.
Polisnan a hasta topa cu un jacket cu emblema parecido na esun di polis, y tambe a topa cu un telefon.
