Den e momentonan dificil, tambe nos ta pensa riba nos Arubianonan bibando den exterior. Con ta bayendo cu nan y kico ta nan experiencia. E biaha aki, nos ta trece e storia di Vivian Koole, ken ta biba na Minneapolis, Merca. E ciudad a hala hopi atencion den lunanan recien pa motibo di algun suceso.

George Floyd

“Mi a nace y lanta den e bunita isla di Aruba, mi ta biba na Merca desde 1981 y mi ta un residente orguyoso di Minneapolis desde 2001. Minneapolis y St. Paul tambe ta conoci como e ‘ciudadnan morocho’ y ta hopi cultural, hopi diverso”, Vivian ta bisa. “Mi djis tabata kier a comparti algun di mi propio experiencianan mirando locual a pasa recientemente na Minneapolis. Den tiki palabra, shock y incredulidad completo!
 Como residente di Minneapolis actualmente den suburbionan, nos tur a haya un ‘reality check’.” E ta continua bisando cu racismo ta hopi real, y e tabatin hopi suerte di no a bira victima di esaki. “Nos oficialnan di polis ta aki pa protege nos comunidad y niun persona lo mester tin miedo. Mi ta kere cu tur nos lidernan mester tira un bon bista riba nan departamento di polis, locual a sucede aki na Minneapolis.”

COVID-19

“Coronavirus ta afecta mi diariamente. Mi ta traha na un hospital, y mi ta preocupa berdad, pero mi ta confia e lidernan di mi luga di trabou. E coronavirus ta hopi real y na Minneapolis ta obligatorio pa bisti mondkapje den tur luga publico. Como un trahado esencial den cuido di salud ta hopi alentador pa scucha ‘codigo alegria’ riba e intercom, nificando cu un pashent mas a wordo manda cas y a recupera di coronavirus. A pone toque de queda, cual a ser elimina caba y algun di nos tiendanan a cuminsa opera bek cu orario reduci.”

Reapertura di Aruba

Mericanonan lo biaha pa Aruba, pero e isla mester habri su fronteranan cu cautela, Vivian ta pensa. “Mi ta kere e ta echt cuminsa na momento cu e pasaheronan ta bay check in. Haci un chekeo di temperatura y hacie obligatorio pa bisti mondkapje. Mi ta haya falta di mi isla bunita di Aruba hopi, y mi ta asina contento cu mi ta pertenece na e grupo di Facebook, ‘Rubiano bibando na Merca’ (“Arubans living in the US”). Compartiendo cosnan positivo tocante nos isla stima ta teniendo nos cerca, maske nos ta bibando hopi leu.

Como ultimo nota, mi lo kier bisa tur e hendenan bunita, mi famia y amigonan, pa haci e labamento di man y distanciamento social. Keda safe y mi ta mira boso pronto. Te oro.”