Den e temporada dificil aki, tambe nos ta pensa riba nos Arubianonan bibando den exterior. Con ta bay cu nan y kico ta nan experiencia. Awe, nos ta presenta Jacqueline Raven-Hagens bibando na Dubai.

“Mi nomber ta Jacqueline Raven-Hagens y mi tin 36 aña di edad, bibando na Dubai, Emirato Arabe Uni cu mi esposo Albert Raven y nos yiu muhe di 20 luna di edad, Shae. Nos dos ta di Aruba y nos a conoce otro na Amsterdam pa despues, alrededor di seis aña pasa, nos a haya oportunidad pa muda na Abu Dhabi pa trabou. Albert actualmente ta head chef na restaurant Firelake, cu bista na e iconico Burj Khalifa na Dubai. Y ami ta traha como schedule planner pa Apple.

Dubai y Covid-19.
 Nos tabata di vakantie na Aruba bishitando famia y Albert mester a bay Dubai bek mas trempan pa trabou. Shae y ami tabata supone di keda te fin di maart, na momento cu e prome caso di Covid-19 a keda anuncia na Dubai. Gobierno a tuma accion inmediato y a dicidi di test masivamente tur hende cu sintoma. Asina cu e casonan a cuminsa aumenta (tambe pa motibo di e cantidad di test cu tabata realisa) mi a tuma decision di bay cas trempan, den caso cu lo cera frontera, y tabata bon cu nos cambia nos vuelo pasobra Dubai a bay den lockdown completo dos dia despues cu nos yegada, cual tabata dia 15 di maart.

Tres dia despues di nos yegada, nos yiu muhe a cuminsa haya kentura y sacamento. Nos a hib’e hospital, y pasobra nos a caba di yega di un layover na New York, nan a solicita pa nos haci test di Covid-19 y isola te ora nos haya resultado. Afortunadamente nos tabata negativo y a resulta cu nos yiu tabatin Influenza-B. Despues di un estadia den hospital, algun likido y Tamiflu e tabata bon.

Na e momento ey, Dubai a implementa orden di shelter in place. Tur cos tabata cera y no tabata permiti pa bandona bo cas excepto pa emergencianan. No ehercicio, no beach y por cumpra comestibles un biaha pa siman so cu permiso. Nan a pone un sistema di peticion di permiso unda bo por pidi un permiso pa sali di bo cas. Sin esaki bo por enfrenta un multa grandi. E pais a implementa un accion di sanitacion nacional, unda nan a pone drone y autonan grandi tabata bay den tur area y spray cada skina.

Despues di ocho siman di e orden aki, Dubai awo a relaha a reglanan significantemente. Oficina y restaurant ta permiti di habri na 30% di capacidad, tur hende mester bisti mondkap pafo y si ta posibel, glove paden di negoshi. Nos ta permiti pa sali di cas pa un ora, pa haci ehercicio of compras, na cualkier momento entre 6am y 10pm. Despues di 10pm ainda tin un orden di shelter in place, ya cu ainda nan ta core rond pa spray desinfectante.

Ya cu por yega 50 grado Celsius den berano, mayoria di negoshi ta paden di un centro comercial. Tur hende trahando den un centro comercial mester haci test, y bishitantenan menor di 12 aña y mayor di 60 aña no ta permiti entrada. Loke ta nifica cu nos yiu muhe no ta sali di cas excepto pa un caminata ocasional. Ainda mondkap ta obligatorio unabes ta pafo y ya cu nos yiu ta mucho chikito y ta keda kit’e, nos ta hib’e solamente cerca di nos comunidad. Mester bisa cu nos ta sinti sigur cu e forma con e pais a maneha e situacion. Nan ta un di e paisnan lider den e cantidad di test cu a haci, mayoria gratis.

Y maske nos no a sali di cas den mas di tres luna, cu excepcion di un cena y e compras ocasional (tur compania awo ta haci entrega na cas) nos ta contento y saludabel. Restaurant di mi esposo ta den proceso di habri bek poco poco, y ami tin suerte cu mi compania ta cuida di mi.

Obviamente nos ta preocupa pa nos famia na Aruba. Nan tin nan propio negoshi cu a haya nan mes forsa pa cera temporalmente, y esey tin un impacto grandi. Tambe nos tin miedo cu un miembro di famia por bira malo, cu nos asina leu y tur frontera cerca, nos no lo tin manera pa bin bek cas den futuro cercano.

Cu speransa tin luz na fin di e tunnel!”