Un Arubiano ta rumbo pa Zuidpool December proximo. Y ta captando atencion na Inglatera pa e reto aki. Genevieve ‘Genny’ Brown (37) tin tres aña ta preparando pa haci historia. Y a combersa cu Bon Dia Aruba despues di a pasa seis (6) ora ta lastra tire den e bario unda e ta biba como parti di su preparacion fisico.

Con a tende di Genny? Pasobra media Ingles a cuminza pone atencion riba dje. Y un corant regional publica su storia.

Brown a capta atencion local y nacional na Inglatera despues cu fotografo Ingles Nick Cornwall, kende ta trahando un cronica ‘Living La Vida Lockdown’ a mir’e ta lastra e tirenan y a saca su potret pa un proyecto grandi na Inglatera. Ta un exposicion na 2050 unda lo inclui tur e miho potretnan saca durante e Covid19 lockdown.

Cornwall sinembargo a haya cu e storia di Genny tabata asina interesante cu el a conta di dje riba su instagram pa plama e storia. Y un di e medionan cu a capt’e tabata e corant Balham, cu a publica un storia dia 6 di Juli ultimo.

Obhetivo di Genny Brown ta pa ta den condicion optimo pa na December tuma e ruta di un (1) grado di latitud zuid – Zuidpool den 12 a 14 dia (depende e condicion di tempo) riba ski. Un hazaña cu ta nifica lastra su tent, su cuminda, tur su necesidadnan su mes pa un distancia di 111 kilometer, riba un altura di 2800 meter. Ta e periodo ‘calor’ di Antartica y e zona tin un temperatura promedio di 26 centigrado bou cero.

Y motibo pakico e ta haci’e, no ta pa un aventura sin mas. E profesional Arubiano kier recauda fondo pa Lyme Aid UK, di forma cu por haya un centro diagnostico pa e malesa cronico aki. Genny tin Lyme Disease.

Infecta pa semper

Lyme disease ta un malesa incurabel cu ta keda traspasa pa un tipo di carpata cu ta biba den areanan mas friu, e ‘deer thick’. Sintomanan di Lyme ta varia. Pero nan por debilita un persona pa bida. Na 2014, Genny a haya un mordi durante un vakantie na Turkia, tabatin keintura pa dos dia, y despues no a sinti malo, y no a pensa mes riba e pica. Ni ora cu su cabey a cuminza cay na cantidad tres luna despues . “Mi tabatin un afro grandi y mi tabatin tur e cabey den mi man.” Asina a inicia su lucha pa bringa e malesa. Fatiga pisa -Genny tabata drumi 20 ora pa dia cierto momento – y perdida di memoria tabata e aspectonan mas preocupante. Asina el a bay diferente specialista cu no por a saca afo kico a pas’e y kier a pone riba un tratamento di antibiotica pa por lo menos un aña. Brown cu ta un Bio-quimico di profesion no a acepta y a acudi na un dokter natural cu tambe ta un dokter di medicina regular. A pesar cu Inglatera tin un di e sistemanan medico miho rond mundo, Genny Brown a paga 500 libra Ingles (1200 florin) pa un test cu e ultimo dokter a manda na un laboratorio na Alemania pa mira si ta Lyme Disease e por tin. E resultadonan tabata afirmativo. Y asina a cuminza un tratamento adecuado. Awe e tin e malesa ainda, pero bou control. Ora e ta hopi cansa e ta haya e mesun sintomanan similar na esnan di comienzo di alzheimer, esta cu e por lubida palabra.

Idea pa Antartica
 Brown a bisa cu e ta un di e storianan di suerte. Hopi hende ta sufri pa semper. Pero “ami tabatin dos opcion. “Rabia cu e sistema medico of haci algo a cambio. Y bira amarga no tabata opcion.” Asina a lanta e urgencia pa trece cambio. “Y ma pensa kico ta e cos di mas loco cu mi por haci. Mi no kier djis core un marathon.”

E idea di bay Zuidpool a nace ora cu el a bay un presentacion di un compania cu ta organisa biahenan inspirador/aventurero. Yiu di su hefe a sugeri’e pa bay. Eynan el a haya e idea pa bay Antartica cu e meta pa lanta conscientisacion di Lyme Disease y e necesidad pa Inglatera mes tin su centro diagnostico. Brown a pensa hopi prome di a tuma e decision. E mes a studia na Canada, y e no tabata mucho entusiasma di e friu. Y e no tabata e persona cu tabata asina atletico. “Mi tabata core bon, pero mi tabata e ultimo cu nan tabata piki pa hunga volleyball ora mi tabata na Colegio. Pero mi a bolbe di un situacion cu mi tabata drumi 20 ora pa dia y ma dicidi pa scoge pa un reto cu ta net lo contrario cu ta exigi un esfuerso fisico enorme y esaki lo habri mente di hende.”

Tire Lady

Y ya ta tres aña den su preparacion cu a inicia cu entrenamento cu peso y condicion. Genny a siña ski na Canada y tabata rollerski, haci ehercicionan pa altitud y otro. Ora cu e lockdown a bin e aña aki, e mester a adapta su training, aunke e mester a cancela algun elemento crucial. Locual si el a logra ta train pafo ta lastra tire. E mes ta traha na cas, pa siguridad cu e no ta keda infecta cu e coronavirus cu por ta hopi peligroso p’e, mirando cu e lo no cura di Lyme Disease. Pero su condicion ta optimo. “Mi ta lanta 4or di mainta, dos biaha pa siman pa lastra e tirenan pa dos ora prome cu mi cuminza traha y riba diasabra, pa 5 a 6 ora. Den mi bario nan conoce mi como ‘The Tire Lady.’”

E costonan tambe ta halto. E dama Arubiano a logra acumula 65 mil dollar na sponsors y falta 15 mil ainda. Si e no logra haya mas sponsors, e mes lo paga pa e resto. E placa cu e ta recaudando ta bay completo pa e Lyme Aid UK. E lo ta den un grupo di tres persona mas un guia. Ainda e mester conoce su compañeronan cu tambe ta haci’e pa recauda fondo pa yuda organisacionnan. E lo conoce nan otro luna, pa asina forma un laso pasobra “nos ta bay pasa 24 ora hunto y mester tin confianza cu otro. Hasta ora di bay baño.” Su famia na Aruba no por caba di compronde e curashi di Genny.

Kisas ta e combinacion di Arubiano y e hazaña pa Antartica ta locual cu mas ta yama atencion. E hecho cu un persona di tropico ta bay den un di e zonanan mas friu pa un reto grandi, tin su resultado. Banda di e articulo den e corant local, tambe su sponsornan ta publica su storia.

Antarcticaruban

Genny a studia bio-quimica na Canada, y despues no haya trabou na Aruba, el a tuma e oportunidad pa sigui cu su carera na Inglatera. For di principio caba ta puntr’e di unda e ta. E no tabata cuadra den e imagen cu tin di personanan di Caribe . “Mi ta kere e hecho cu mi ta papia hopi idioma ta yamativo. Pero mescos cu na Canada, nan tabata puntra mi di con nos di Aruba ta diferente.” Den concepto di Brown, e historia di Aruba ta hunga un rol cu ta pone cu mayoria Arubiano ta mas confortabel unda cu nan ta biba y esey ta pone cu nan ta haya un luga lihe den comunidad.

Y awor door di scoge e nomber Antarticaaruban, e ta yama mas atencion ainda, particularmente pasobra e ta yuda e pais unda e ta biba. Y sigur si e logra, e lo ta un bon embahador pa Aruba tambe na Inglatera. “Hopi Ingles a tende di Aruba y ta asoci’e cu paraiso.” Y awor nan por asoci’e cu un Arubiano cu ta percura pa mehora nan sistema di cuido.

“Como un hende muhe colo scur di Caribe y particularmente un isla chikito manera Aruba, mi ta hopi consciente cu poco di nos tin e oportunidad pa haci algo asina. Hopi di nos ta confronta bareranan hasta pa biba nos bida diario. Y un reto asina aki ta mustra hopi leu y imposibel. Locual ami ta gusta ta inspira otro pa pone metanan halto, soña grandi, traha duro y nunca keda satisfecho cu locual otro ta kere cu abo por.”