Arubiano cu a bolbe di exterior: ‘Mi no a haya instruccion con pa pone mi mes den cuarentena’

Un Arubiano kende recientemente tabata di bishita na Europa, a conta nos con e proceso di bolbe Aruba tabata, den cuadro di medidanan global relaciona cu coronavirus.

E persona a papia den condicion anonimo, mirando cu ta un situacion hopi delicado y no kier expone su mes y otronan rond di dje na violacion di privacidad.

El a conta Bon Dia Aruba cu e tabata na Europa pa algun tempo, pero a dicidi di stop su biahe trempan y bolbe Aruba na momento cu coronavirus a bira un pandemia, mirando cu prome minister, Evelyn Wever-Croes a pidi pa tur Arubiano bolbe lo mas pronto posibel.

“Na e ciudad unda mi tabata, tabata boet hende si ta riba caya sin motibo. A rekeri tur hende pa bisti mondmask den publico. Si bay un shop of luga publico sin mondmask, e shop ta haya boet. Tambe a institui medidanan special pa hende di edad avansa, manera haci uso di shop den cierto oranan exclusivo. Pa haci uso di transporte publico mester bisti mondmask.”

Mirando cu varios aerolinea a laga sa cu lo stop operacion, e persona a tuma decision pa adelanta su fecha di regreso. Pa cambia su ticket original no tabatin costo. Pero despues, pa motibo di prohibicion di entrada na Aruba, a cancela su vuelo. Toch a logra reschedule cu KLM, pero na momento cu a bay pa check in, a bisa cu e vuelo ta cancela y pa re-book. Esaki no tabata posibel online sino solamente tumando contacto cu un agente of na aeropuerto. E persona a purba tuma contacto cu KLM na e ciudad unda e tabata, KLM na Hulanda, of via WhatsApp, pero e number semper tabata zona ocupa. A purba pa oranan largo henter dia, sin resultado.

Durante su conferencia di prensa algun dia atras, Wever-Croes a duna un number di ATA pa pidi asistencia den casonan asina. E persona aki a yama e number en cuestion pa splica su situacion, cu a haya problema pa re-book y cu no por haya contacto cu e aerolinea. “ATA a dura varios ora pa contesta, y nan contesta tabata unicamente cu KLM ainda tin vuelo y por tuma contacto cu e aerolinea – esaki despues cu mi a splica cu no por tuma contacto.” Segun e persona, ATA a limita na bisa cu vuelonan ainda tabata saliendo, sin ofrece mucho ayudo. “Mi a tende cu varios persona tampoco a haya ayudo di ATA.”

E persona a dicidi di djis bay aeropuerto y mira si por subi riba e vuelo cu a purba di re-book. “Mi a pack tur cos y bay aeropuerto pa 6am Mi tabata e prome persona eynan.” Aeropuerto na e ciudad Europeo aki tabata bashi. Na momento cu a yega KLM pa check in, tabatin apenas 5 persona su dilanti, poco poco un rij chikito a cuminsa forma su tras. “E personanan mi tras tabata tosa aki aya, pero no tabatin ningun control en absoluto. Tabatin apenas 2 desk habri di KLM, e resto tur tabata bashi.”

Na e desk, a puntr’e si su ultimo parada ta Aruba, si e ta residente. A keda papia riba telefon te cu supervisor mester a bin. “Mi kier sa mi a keda 10 minuut ta warda.” El a recorda cu a haya un conseho pa mustra identificacion di Aruba pa agilisa e proceso. “Net ora di aborda pa sali di e ciudad caminda pa Amsterdam, nan a bolbe puntra si mi ta biba na Aruba. Mi a mustra nan mi rijbewijs y nan a laga mi pasa di biaha.”

Den henter e aeropuerto caminda pa yega gate pa aborda, un persona so el a mira. “Esaki ta prome biaha cu mi ta bay pasa Customs y ta ami so. Ami so tabata eynan.

Bon Dia Aruba a puntra ki screening a haci prome cu laga pasahero aborda. “Ni na e ciudad unda mi tabata ni na Amsterdam tabatin screening di salud, ni laga check bo temperatura, ni puntra si tin sintoma.”
Unicamente stranhero cu permiso ‘short-stay’ tabatin mag di sali di e ciudad en cuestion, persona cu permiso permanente di residencia of residente mes no mag di sali.

“Avion pa Amsterdam tabata hopi bashi, djis hende Hulandes y par di hende Mericano purbando di yega Merca, por ta.” Pero e vuelo directo pa Aruba tabata pio, pasobra esey tabata casi solamente Arubiano. E vuelo tabata bayendo Bonaire pero pasando Aruba. “Asina mes, tabatin, segun mi por calcula, 20 hende, contando hende di Bonaire.” El a saca e potret adhunto di e avion den cual el a biaha di Amsterdam pa Aruba.

Pa ‘weight balance’ a pone tur hende sinta na e bentana. Tur hende tabata sinta dilanti. E piloto a pasa mira si tur hende tabata sinta na su luga. Poco prome cu despegue, un steward a scoge hende pa manda patras di e avion, alrededor di 4 persona. A bisa cu ta pa via di ‘weight balance’ y cu por a bay bek na e asiento original. “Nos tabata mas tanto sinta tras di otro, pero na e bentana.”

“Na momento di biaha di avion, net prome cu yega Customs, tabatin un polis cu un hende den full hazmat suit, cu un thermometer den su man. Bo ta yega, e ta pone na bo frenta mientras ta puntra si den ultimo dianan tabata sinti tosamento, dolor di garganta, keintura. No? Dal bay.”

“Na momento di mustra bo paspoort pa entrada, nos a ricibi e documento pa firma. E documento ta splica cu tur hende mester yuda pa combati crisis di virus.” A pone nan firma cu nan a compronde e acuerdo. Sinembargo, no ta duna instruccion cla con pa cuarentena, con ta bay forsa cumplimento. No a bis’e nada di con precies pa pone bo mes di cuarentena, ni duna ningun instruccion. Tampoco a informa e persona aki si lo tin chekeo durante cuarentena.

Pa awo, e ta kedando cas, purbando di evita contacto cu miembronan di su famia. “Mi ta bisti mondmask ora mi bay den areanan comun, y keda leu di mi famia”, el a bisa.