Ayera atardi durante un protesta acciona en conhunto entre Aruban Warriors y Fundacion Accion Ambiental, un grupo di ciudadano a laga nan bos resona contra e desaroyo di area di Sero Colorado pa asina Three Rivers Real Estate N.V. por construi un hotel all-inclusive di 900 camber den e area unda antes tabata mina di fosfaat.

“Por ta Aruban Warriors ta bay gobierno, pero pa prome nos tin un ‘stempel parlament’. Con cu ta, nan no ta bay contra gobierno. Nan ta papia manera cu gobierno ta papia. […] E persona cu ta bin cu e hotel aki ta Otmar Oduber hunto cu Dangui. Nan no por bay pleita cu Otmar, pasobra esey t’e lijm, Otmar lo wanta nan. Si nan pleita cune e cos ta caba. Y esey no ta bay pasa”, Segun Helena Croes di Aruban Warriors.

‘Gobierno ta bin cu su propio NGO’
Pa Helena Croes di movimento Aruban Warriors, gobierno no ta actuando cu transparencia, mirando cu no ta duna informacion cla riba e manera con e proyecto aki ta canando. Un observacion ademas ta cu aña pasa e mesun grupo conhuntamente cu otro grupo a protesta contra desaroyo di Isla di Oro. Pa e proyecto cu Zoëtry lo kier a desaroya, minister di infrastructura y medio ambiente Otmar Oduber (POR) a declara cu a pidi conseho di Directie Natuur en Milieu (DNM) y di DIP, cual a conduci e mandatario na e decision di no aproba e desaroyado su peticion. E pregunta pa minister: cua ta DNM su conseho relaciona cu desaroyo di area di Sero Colorado?

Marcos Bislip, presidente di Fundacion Accion Ambiental, a declara cu como fundacion nan ta traha riba nivel di Nacionnan Uni, esta e United Nations Environment Program (UNEP). Bislip ta mira cu gobierno ta bin cu su propio consehonan y su propio NGO pa asina por sigui cu proyecto sin consulta NGO cu ta independiente, neutral y ta traha segun liñanan prescribi pa UNEP y UNESCO. Riba pregunta di periodista di Bon Dia Aruba unda ta referi na e posibilidad di envolvimento politico den e consehonan cu NGO ta emiti, Bislip a reacciona bisando cu ‘nos ta keda stret riba e puntonan cu UNESCO y UNEP ta prescribi, na cual un NGO tin cu tene nan mes’. “Nos por sinta na mesa cu cualkier gobierno, pero nos ta pone nos puntonan y esaki ta bay den liña di Nacionnan Uni.”

Si desaroya Sero Colorado lo tin consecuencia pa mangel y tunnel bou tera
“Hotel ta un cos cu bo tin cu trah’e unda bo no ta destrui naturalesa. Aki bou ta pasa tunnel di awa, un tiki mas panort tin e tunnelnan di fosfaat ta pasa, y di eynan tin e cuebanan. Ademas tin restonan di e indjannan, pues nos antepasadonan, cual a haya den e area aki. Kiermen ta importante pa sa e balor di e luga prome cu bo construi algo riba dje”, Bislip a declara. Segun Bislip, ora cu bin cu desaroyo tin cu midi cuanto por bin cune y con grandi e area cu bo por desaroya ta. “Esey nan no ta papia cu NGOs y organisacionnan ambiental. Pasobra un hotel di 900 camber den area aki ta un poco exagera.”

Reclama tera ancestral
Pa Croes di Aruban Warriors, si mira historicamente e desaroyo di hotelnan na Aruba, tur a bin pasobra placa a pasa ‘bou mesa’ entre companianan multinational y gobierno local. “Loke Arubianonan mester haci ta haci mescos cu e indjannan na Merca. Nos mester cuminsa reclama e terenonan, pasobra e tabata di nos antepasadonan, y laga nan paga compensacion pa tur e tera cu nan a kita for di nos.”