Mientras minister di turismo cu colaboracion di minister di infrastructura ta spera di desaroya un ‘eco’ hotel na Isla di Oro por medio di cambia ROP, Aruban Warriors di manera consistente ta contra desaroyo na e area aki y lo tin un manifestacion contra esaki pa 11 di mainta, riba 2 di april.

Den nos edicion riba 14 di maart ultimo, minister di turismo Dangui Oduber (MEP) a expresa su interes pa mira e proyecto di eco-turismo na Isla di Oro sigui su curso ora haci esaki posibel por medio di cambio den ROP. “E ta fit den e vision cu nos tin como gobierno pa eleva e calidad cu nos ta brinda na e turistanan.”

E ta haya cu e proyecto ta atractivo pa Aruba particularmente, mirando cu segun e tin poco proyecto di e tipo ki den Caribe. Ademas ora colega di infrastructura yega asina leu cu e cambio di ROP, e proyecto lo por cuminsa y segun sr. Oduber ‘nan lo percura pa e area keda protegi y pa nan no elimina e medio ambiente’.

Aunke e minister a indica cu no tin habitantenan di Pos Chikito y Savaneta cu ta contra esaki, Bon Dia Aruba a papia cu e grupo di Aruban Warrios kende pa e ultimo 3 añanan ta opone e desaroyo di e area di naturalesa aki unda hopi coral y mangel importante pa nos medio ambiente ta estableci.

Consecuencia pa naturalesa

E grupo aki cu a dicidi di nombra nan mes di tal manera pa honra un grupo di personanan den historia di Aruba cu tabata bringa pa Aruba, incluyendo nos naturalesa, ta haya cu cualkier desaroyo cu bin lo percura pa ‘tur cos muri ey banda’.

Nan como Aruban Warriors tin diferente punto contra e desaroyo di e area pa traha un hotel, no obstante con ‘eco’ esaki ta. Nan ta indica cu pa por cuminsa haci e desaroyo lo tin cu trece ekiponan di mashin grandi cu lo interferi cu e ecosistema di mangelnan. E mangelnan— cual riba nan mes ta importante caba mirando cu mas pariba tin di nan ta muriendo— ta un habitat importante pa hopi criaturanan, incluyendo tortuganan y parhanan. Si mester bay asina leu pa cuminsa e proyecto aki un porcion grandi di e habitat importante pa bestianan lo bay perdi.

Segun Aruban Warriors, den proceso pa traha un manera pa yega na unda e boca ta situa mes lo tin cu aparta 7 meter di mangelnan rondonando e brug pa yega e boca. Sinembargo esaki ta un porcion chikito – aunke esey ya caba ta un peso grandi pa e mangelnan – pasobra no ta conta cu e desaroyo pa e bungalow nan cu nan lo kier pone.

Segun e informacion cu nan a haya por medio di expertonan, pa establece tal bungalow nan, lo tin cu bora den e santo, destruyendo asina e raiznan di e mangelnan bou tera. Esaki ta algo cu te hasta nan a yega di haci anteriormente. Aruban Warriors a conta nos con na cierto momento desaroyadonan a pone un cantidad di palonan den e tera pa asina cuminsa cu e trabou. Nos mes a trece esaki dilanti anteriormente, te cu prome minister di e tempo ey a indica cu desaroyado te na e momento ey no a haya permiso pa cuminsa cu ningun construccion.

Terminologia ‘eco’ un contradiccion

Aruban Warriors ta keda riba e punto cu pa bin cu construccion den un area di naturalesa, ta basicamente imposibel pa no destrui e fenomenonan natural cu ta estableci ey. E terminologia di ‘eco’ turismo cual segun nan otro desaroyadonan a bende na otro paisnan a trece rosamento aunke a priminti contra esaki.

Ademas di e aspecto ambiental, desaroyadonan a purba di trece dilanti cu esaki lo trece desaroyo economico pariba di brug, particularmente na Pos Chikito y Savaneta. Pero nan ta cuestiona esaki pasobra segun nan a compronde, e concepto cu e desaroyadonan a presenta ta di un hotel all-inclusive. Di e manera aki, segun Aruban Warriors ‘teoreticamente un turista no mester bay Pos Chikito mes si tur cos tin na e hotel’.

Aruban Warriors ta lamenta cu tin e pensamento cu esaki lo trece desaroyo economico pa e area sin pensa riba e perdida di recursonan natural cu dia pa dia ta birando menos den luz di desaroyonan rond nos isla. Un di e Aruban Warriors a comenta cu ‘na Bora Bora por ehempel no ta problema pa haci proyectonan asina, pasobra ey tin hopi mas isla. Pero na Aruba nos ta un isla so’.

Tin hopi cos cu ta encera un hotel, cu no ta cuadra cu ta ‘eco-friendly’, segun nan. Aruban Warriors ta trece dilanti por ehempel e cuestion con lo anda cu sushi di e turistanan. “Con nan lo a anda cu desperdicio?”

‘Bo tin cu lanta e hendenan’

Mirando tur esaki, Aruban Warriors lo ta manifestando riba 2 di april pa 11or di mainta dilanti Isla di Oro, pa asina mustra cu no tur hende ta di acuerdo cu e proyecto. Pa nan e ta importante pa ‘lanta e hendenan’ pa loke ta trata tuma accion pa naturalesa, mirando cu ora bin un desaroyo destructivo e ta demasiado dificil pa draai esaki bek. Nan ta enfoca riba stop proyectonan cu por trece daño na naturalesa, pero prome cu e proyectonan cuminsa.