E prome grupo di 23 studiante cu Arubalening e aña aki ta bay biaha diasabra awor 29 di juli y otro grupo ta bay sali 1 di augustus cu un cantidad di 113 studiante aproximadamente, segun Departamento di Enseñansa a sigura.
Sharline Croes-Dubero, coordinador di Facilidad pa Estudio na Departamento di Enseñansa, den un entrevista cu Bon Dia Aruba a sigura cu e aña aki tabatin 550 peticion pa studiantenan por studia na diferente pais, incluyendo Aruba. Despues cu e resultadonan di examen a drenta, 461 peticion a keda aproba segun cifranan preliminar, ya cu na final di augustus y september, ora cu nan caba di procesa tur, nan por duna e cifranan exacto di peticion aproba.
Croes-Dubero a splica cu 70 peticion ta pa esnan cu kier studia na Aruba, entre esaki, pa studia na Universidad di Aruba tin 44 peticion, 18 pa Instituto Pedagogico Arubano (IPA), 15 pa Colegio EPI y 3 master na Universidad di Aruba.
Pa otro paisnan, nan tin 391 peticion di cual 272 ta pa Hulanda, 25 pa Merca, 16 pa Canada, 5 pa Corsou, 1 pa Hungria, 1 pa Puerto Rico y 1 pa Colombia, ademas di 21 master pa Merca y Hulanda. Manera a menciona caba e cifranan aki ta varia.
Croes-Dubero a menciona cu diasabra awor 29 di juli un grupo di 23 persona ta bay direct na Tilburg y Eindhoven y pa diasabra 1 di augustus nan tin un grupo di 113. E otro studiantenan ta bay biaha riba nan mes, sea nan a bay caba of nan ta bay despues di e dia aki.
El a enfatisa cu tin por lo menos cinco studiante cu ainda no a entrega nan overeenkomst tot geldlening y nan verklaring tot toekenning, e dos documento cu nan ta pidi pa por paga nan y ora Departamento di Enseñansa ta haya esakinan e studiante por haya nan pago.
E cinco studiante aki lo haya nan pago despues di dia 1 di augustus, debi cu esaki tin su proceso pa cana manera el a sigura na departamento di Financien.
Prome dia cu nan ta bay, nan mester manda na AZV un e-mail cu nan ID hunto cu nan ticket indicando cu nan ta bayendo for di Aruba pero toch nan AZV ta keda core.
Ora cu studiantenan ta yega na Hulanda diaranson di otro siman, nan ta bay ricibi pa Arubahuis y Plaatselijke Opvang Commissie (POC) di cada ciudad cu ta bay tin un programa pa nan plania cu ta entre otro, nan tin cita cu Censo pa nan por inscribi y na gemeente si nan tin un camber caba pa biba eynan.
Mayoria di studiante a haya nan camber caba. Di esaki, Croes-Dubero a bisa cu compara cu aña pasa, esaki a bay miho y e no a tende di studiantenan cu no por bay pa via di no por haya camber.
“Si algun di nan no tin camber ainda, nos ta prefera pa no bay, pasobra nan tin mester di un adres pa nan por inscribi y haya nan BSN number pa nan por haci tur nan cos,” el a comenta.
Entre e retonan cu studiantenan ta enfrenta ora nan ta sali bay studia na Hulanda por ehemplo, aparte di camber manera el a afirma, hopi biaha tin di nan cu nunca a yega di subi un avion, nunca a yega di biaha of nunca nan no tabata hopi tempo largo leu for di cas. “E reto ey di ta bo so ta un di nan, problemanan psikiatrico tambe, ta algo cu nos ta mira hopi bao studiantenan y locual nos ta recomenda ta pa no cera bo mes y keda den contacto cu famia. Si ta sinti cu algo no ta bon, tuma contacto cu e mentor, amigo of famia, esey ta hopi importante, cu ta keda como e reto di mas grandi, ademas di custuma y e idioma Hulandes cu no tur studiante nan idioma Hulandes ta bon,” Croes-Dubero a señala.
El sigura cu studiantenan aki por yega leu y nan mester kere den nan mes. Nan a yega asina leu cu un HAVO por ehemplo, cu nan tin e capacidad.
Tocante e careranan, na e momentonan aki el a sigura cu tin hopi solicitud pa International Business, Creative Business, entre otro, pero tambe e aña aki tabatin hopi solicitud pa studia Arte, como Musica of Danza, y e parti di Agricultura y Horticultura. “E parti di farming ta hayando mas peticion, locual por nifica posibel trabao den futuro pa reemplasa loke tin aworaki y probablemente por bin back Aruba.”
Esey ta e reto cu tambe ta existi, cu na Aruba nan no ta bay haya e salario cu nan ta haya na otro paisnan; si tin studiantenan cu ta bin back y nan ta haya trabao na Aruba tambe, pero e diferencia di salario ta keda.
Pa loke ta trata BEURS, cu ta trata di un beca cu e solicitantenan no tin cu paga back, el a menciona cu esey no ta influencia ainda. Nan suma ta di 15.000 florin pa startpakket y cada seis luna 3.881 florin, locual no ta suficiente manera Croes-Dubero a sigura. Esaki ta nifica cu nan mester tuma e lening di DUO di Hulanda, pero tin studiantenan cu ta bisa cu no mester di e 3.881 florin ey y ta tuma 15.000 so pa motibo cu nan ta siña biba cu e cantidad di placa aki.
Tabatin algun cambio den e reglanan pa motibo cu nan ta trahando un ley nobo. Antes studiantenan tabata pidi start termijn betaling y nan por a scoge entre start of start termijn, pero nan a elimina esey. Awor por scoge start termijn so, pa motibo cu nan tabata pidi start so y despues start termijn y esey no por, debi cu nan ta uitgeschreven y nan a cambia esey den ley.
Tambe dentro di dos aña cu e studiante a bay afo ainda tin chens di pidi lening, pero nan ta bay haya e termijn betaling so y pa esnan cu ta studiando caba, cu antes tabata cu studiante mester score 70% minimo di e puntonan y aworaki nan a bah’e na 60%, esaki ta algo cu nan ta evalua cada dos aña y nan mester haya nan propedeuse den dos aña.
Di studiantenan cu a bay aña pasa, Croes-Dubero a afirma cu tin di nan si cu a haci un cambio, sea di scol of di opleiding y ta algo cu ta normal. P’esey ley ta duna nan e chens pa nan por haci esey.
E ta recomenda pa prome cu bay studia haci un ‘job shadowing’ cu ta un tipo di training di e opleiding cu ta bay scoge pa wak kico ta encera. Si por ehemplo kier traha den un laboratorio, por yama y puntra na un laboratorio si por cana cu e trahadonan un par di dia solamente pa haya un idea di kico e trabao ta trata y si ta gust’e.
Informacion extra pa esnan cu ta biahando awor
Croes-Dubero a informa na studiantenan cu ta bayendo aworaki pa acerca na Departamento di Enseñansa awe mes y busca nan badges entre 8:00am pa 12:00pm y 1:00pm pa 4:00pm pa asina nan por keda cla.
