E team di Arubahuis cu ta consisti di empleadonan di Arubahuis, e mentornan y diferente miembronan di e Plaatselijke Opvang-commissie (POC) ta cla pa ricibi nos hobennan na Schiphol.’‘E preparacionnan pa ricibi e grupo nobo di studiantenan cu ta yega Hulanda e siman aki ta extenso pero bayendo bon.
Esaki Minister Plenipotenciario Guillfred Besaril a bisa na antesala di e yegada di e grupo di 177 studiante for di Aruba cu lo ta yegando cu e asina yama vuelo di “beursalen”. E aña aki e studiantenan lo yega riba dos vuelo. E prome vuelo ta yega Hulanda diaranson 31 di juli y e siguiente dia 1 di augustus e di dos grupo di studiantenan lo yega Aruba. Banda di e grupo di studiante aki, tin varios studiante cu a dicidi di bin Hulanda mas prome pa sea disfruta di un vakantie, of pa caba di busca y regla vivienda.
Departamento di Enseñansa di Arubahuis a traha duro e ultimo simannan hunto cu Departamento di Enseñansa di Aruba pa canalisa e yegada di e grupo grandi di studiante na Madre Patria. ‘Un cambio grandi compara cu aña pasa ta cu e team di mentornan a keda aumenta cu cinco mentor nobo, banda di e tres mentornan existente. Di e manera aki nos a percura pa e guia di nos
studiantenan a wordo optimalisa, asina Minister Plenipotenciario Besaril a bisa. E mandatario ta bolbe enfatisa e importancia di un bon preparacion di e studiantenan prome cu nan bin Hulanda. ‘Ta p’esey nos a bay Aruba na juni ultimo pa informa e studiantenan mas miho posibel riba kico ta spera nan unabes cu nan sali for di Aruba. E preparacion aki ta cardinal pa e studiante por cuminsa su estudio lo mas trankil posibel.’
‘Nos meta como Cas di Aruba ta pa na un manera structural duna guia y informacion na e hobennan cu ta scoge pa bin studia na Hulanda. No unicamente ora cu nan ta cla pa bin studia, pero mas tempran, prome cu nan dicidi den ki ramo nan kier bay studia. Escogencia di un estudio ta determinante pa nan futuro profesional. Tambe ta sumamente importante pa bo tene cuenta cu despues di bo estudio, riba e posibilidadnan di trabou na Aruba,’ segun Minister Plenipotenciario Besaril.
E mandatario a bisa cu un di e retonan cu e studiante ta enfrenta ta pa inscribi nan mes na un gemeente. Minister Besaril: ‘Tin gemeente caminda ta dura 4 pa 6 siman prome cu bo por inscribi bo mes. Si bo no ta inscribi na un gemeente ta dificil pa habri un cuenta di banco y bo no por busca dokter di cas of dentista. P’esey nos kier bisa nos hobennan pa mira mas leu cu e ciudadnan conoci pa studia y biba cu ta Amsterdam, Rotterdam, Den Haag y Utrecht. Den otro ciudadnan tin Hogescholen y Universidadnan cu kisas tambe por brinda e mesun tipo di estudio, mientras cu na hopi di e luganan aki ta menos dificil pa haya vivienda y inscribi bo mes. E asunto di inscripcion na gemeente tin nos atencion y nos ta invertiendo den e contacto y relacion cu e diferente gemeentenan pa asina optimalisa e proceso aki pa nos hobennan.’
E topico di vivienda ta un cu tur aña ta bin dilanti. Akinan e mandatario a bisa cu e
studiante mes tin un responsabilidad grandi. ‘Pa haya un camber of otro tipo di vivienda ta
sumamente importante pa inscribi bo mes mas pronto cu ta posibel na un di organisacionnan cu ta ofrece cambernan. Por ehempel na Arnhem y Nijmegen, bo mester inscribi na cuminsamento di october di e aña aki pa bin na remarca pa haya un camber otro aña. Pa e ciudadnan conoci pa studia e situacion di vivienda ta aun mas dificil y bo mester ta un minimo di dos aña inscribi pa cualifica unabes bo yega Hulanda’ Minister Plenipotenciario Besaril a sigui elabora.
E mandatario kier a desea e studiante bon biahe for di Aruba pa Hulanda y hopi curashi,
perseverancia y exito den nan estudio. ‘Nos ta topa diaranson y diahuebs na Schiphol y durante di e opvangweek!’ asina Minister Plenipotenciario Besaril a termina su mensahe na e studiantenan.
