Na de Koningskerk na Amsterdam a tuma lugar diasabra 17 di december un servicio pa tuma despedida di dominee Hein Hessen, cu ariba 10 di december a fayece na edad di 90 aña. Entre e personanan presente den e misa tabata tin un delegacion di Arubahuis encabesa pa directora a.i. drs. Glenda Hernandez.
Durante di e servicio Sra. Hernandez den nomber di Arubahuis a hiba palabra unda el a bisa cu Aruba ta hopi agradecido na dominee Hein Hessen pa tur loke el a nifica pa Aruba. “Nos conoce dominee Hessen como predicante pa misa Protestant na Piedra Plat. Tambe el a duna les di godsdienst na Colegio Arubano. Despues cu el a baha cu pensioen el a bin biba na Hulanda, unda pa hopi aña tabata studiementor pa studiante Arubiano. Tambe Sr. Hessen a traha na Arubahuis y tabata duna sosten na e personal door di controla carta y notanan riba Hulandes,” asina Sra. Hernandez a bisa.
Tambe e directora di Arubahuis a conta cu ela papia cu personal y otro studiementornan a bin compronde cu Sr. Hessen tabata un persona hopi keri, respeta y nan tabata tin masha aprecio pe.
Finalmente Sra. Hernandez a desea esposa, yiunan, nietonan y demas famia di dominee Hessen hopi forza den e dianan aki y cu Sr. Hessen sosega na Paz.
E potretnan ta cortesia di Arubahuis.
