Den fin di siman cu a pasa, Glenn Ling a yega Hulanda pa cuminsa cu su funcion como director ad interim na Arubahuis. Na Schiphol sr. Ling y su distinguido esposa Brenda Ling-Larmonie a ricibi un caluroso bon bini pa minister plenipotenciario, Guillfred Besaril.
Durante un encuentro den Sala Betico di Arubahuis, sr. Besaril a haci introduccion di Glenn Ling, como director ad interim na Arubahuis na e personal di Arubahuis y ATA Europa.
Tambe e mandatario a haci uzo di e oportunidad pa presenta su distinguido esposa, esta Siglaine Besaril-Wever y esposa di Glenn Ling, Brenda Ling-Larmonie na e personal.
Minister Besaril a bisa di ta hopi contento cu sr. Ling a acepta e encargo como director a.i. na Arubahuis y asina guia e proceso unda Arubahuis mester transforma di un organisacion administrativo pa uno cu ta brinda mas servicio na e comunidad Arubano na Hulanda, sea esaki ta studiante, Arubiano cu ta na Hulanda pa cuido medico of cualkier yiu di tera cu mester asistencia.
Sr. Ling a gradici minister Besaril pa e confiansa poni den su persona pa logra e retonan cu tin poni pa Arubahuis y cu e cooperacion di tur trahando na Arubahuis ta clave den realisa esaki. Despues di e introduccion sr. Ling a cera conoci personalmente cu e personal y a tende di nan funcion na Arubahuis.
Via Facebook di Arubahuis, minister Besaril a duna un declaracion live riba e introduccion di sr. Ling como director a.i. di Arubahuis.
