E ArubaDag Festival cu lo mester a tuma luga 29 di maart proximo den Ahoy na Rotterdam a keda posponi. Esaki ta esencia di e declaracion haci pa Minister
Plenipotenciario, Guillfred Besaril, diabierna siman pasa via un video riba Facebook.
Arubahuis a bin nota cu algun di e medionan di comunicacion a usa e palabra “cancela” den nan titular of como palabra central den nan comunicado di Prensa. Comision ArubaDag ta lamenta esaki pa motibo cu e ta ocasiona confusion totalmente innecesario.
E decision di pospone ArubaDag Festival 2020 te un proximo aviso, no tabata uno facil. Pero enbista di e incertidumbre y preocupacion cu ta reina actualmente cu e corona virus na Hulanda, a pone cu e decision na pospone tabata esun di mas responsabel tanto como Gobierno, como organisado di e evento.
E siman aki lo sinta cu entre otro KLM, Hotel y Ahoy pa sondea conhuntamente un fecha nobo, mas despues den e aña, pa e ArubaDag Festival 2020. Esaki ta nifica automaticamente cu e lo tuma luga na momento cu e situacion cu e corona virus ta bou di control y cu tanto e siguridad como bienestar (salud) di tanto e bishitantenan como e artistanan por wordo salvaguardia.
Di antemano nos ta hopi agradecido cu e sosten cu nos a ricibi den comunidad Arubano riba e decision aki y gustosamente comision lo mantene un y tur informa.
