Diadomingo dia 30 di April a tuma luga e ultimo ronde di e competencia di fli na Pepsi Baseball Field na Juwana Morto, cual tabata organisa pa e organisacion Arubacuracao Kite Flyers. E evento aki a cuminsa diabierna anochi cu e competencia di fli cu luz, na unda e ‘Overall Winner Fli cu Luz’ a bay pa High Flyers Johnny. Diasabra y diadomingo a mira e competencia di fli den dia, cual a ser parti den dos parti riba e dos dianan.
Tabata un atardi hopi caloroso, pero e evento no a falta ambiente. Gruponan participando y nan apoyantenan tabata rondona henter e veld. Den cada skina tabatin un cantidad di fli riba vloer, tur cla pa pronto wordo hisa. Participantenan tabata inclui varios grupo di Aruba, pero tambe di Corsou.
Participantenan por a presenta nan fli den varios categoria. Categoria A cu a tuma diasabra mainta te atardi, na unda participantenan a demostra y bula nan fli dia 1 pa 2 meter. Pa e dia aki tambe tabatin plania e presentacion pa fli den categoria B, cual ta encera flinan di 2.15 pa 3 meter largo, pero pa via di e abundancia di fli presente, e competencia pa categoria A a sigui cana te tuma tempo di categoria B. Pues a sigui cu e di dos categoria diadomingo, hunto cu categoria C pa flinan di 3.15 pa 4 meter halto y categoria D pa flinan di 4.15 pa 5 meter halto.
Pa locual ta e titulo di ganado di diasabra pa categoria A, esaki a bay pa Family Kite. Den segunda luga a keda Abreu Flyers. Pa categoria B, e ganado tabata Abreu Flyers den prome luga, sigui pa Syper Flyers cu nan fli di Lola den segunda luga.
Ganado di categoria C ta keda na Shon Do den primera, sigui pa Super Flyers cu nan fli di Jay’s den segunda. Ganadonan di categoria D tabata Curacao Quincy den prome luga y Aruba Kite Flyer cu nan fli di Tropical Terps na segunda luga.
