Steffen Maas, diseñador grafico y ilustrado di Hulanda actualmente bibando na Aruba pa 4 aña a bin cu e proyecto ArubABC despues cu el a nota den su trabou como docente di arte cu mayoria scol basico no tin material disponibel cu ta enfoca riba e cultura, medio ambiente y contexto specifico di Aruba. Esaki specialmente ta e caso ora ta trata di material visual. Maas ta spera cu e proyecto aki lo bay haya bida bou di scolnan basico.
E echo cu tin tiki material visual enfoca riba Aruba den scolnan basico riba e isla, no ta nada desconoci. Hopi hende den comunidad a pasa di kleuter pa scol basico siñando cu plachinan y palabranan manera ‘Maan, Roos, Vis’. Esaki ta pasobra mayoria material di les ta bin di Hulanda of tambe den cierto casonan di Merca. Loke Maas ta sugeri cu su diseñonan y sistema ArubABC, ta pa en bes di Maan, Roos, Vis, muchanan haya chens pa siña cu ‘Ayaca, Djampou, Tamarein’.
Actualmente e diseñado di ArubABC personalmente ta implementando e sistema aki, integrando esaki cu lesnan na scolnan den cual Maas ta duna les un biaha pa siman, esta: Santa Famia, Franciscus College, Princes Amalia y Pius X School. Maas ta bisa cu den e proceso aki, cual por bisa ta manera un proyecto piloto pa e sistema, “mi ta haya feedback di e muchanan, pasobra muchanan ta hopi honesto, riba con nan ta haya e plachinan y con e experiencia di siña cu nan ta. E idea ta pa e ta un manera leuk di siña tocante Aruba mientras cu muchanan ta siña lesa y mientras nan ta bin den contacto cu e idiomanan cu nos ta papia na Aruba.”
Den e proceso pa desaroya e proyecto aki, cual tin poco mas cu 1 aña ya den desaroyo, Maas ta hayando opinion experto di tanto profesionalnan den veld di enseñansa, cual ta dun’e feedback riba con pa mehora e proyecto, como tanto di banda di Papiamentistanan, manera e conoci Ramón Todd Dandaré, pero no limita solamente na su persona. E ortografia di e palabranan cu e diseñador ta ilustra ta sigui e ortografia oficial stipula den e buki blauw.
World Literacy Foundation partner di ArubABC pa amplia proyecto na otro isla.
Maas a dicidi di traha hunto cu World Literacy Foundation, cual ta un fundacion estableci na Australia y Merca cu ta promove e acceso na material di les pa muchanan rond mundo. E idea ta, mirando cu e fundacion ya tin un plan pa cuminsa traha den Caribe Hulandes, pa nan aplica e concepto di ArubABC tambe na islanan ruman Corsou y Boneiro. “Ora cu nos ta asina leu, cual nos no ta ainda, nos lo adapta e dibuhonan of crea diseñonan nobo pa cada isla su cultura specifico, tambe pa e otrografia specifico di cada isla.”
E problema hopi biaha cu islanan manera Aruba, Boneiro y Corsou, ta cu no tin hopi recurso pa traha material di les dirigi riba e cultura local, y cualkier material cu mira luz di dia, ta keda isola na e isla specifico unda ta implement’e. Pa e rason aki Maas a traha un tipo di database di e material existente, cu solamente lo mester modifica por ehempel por medio di cambia par detaye y color di un otro parha cu riba otro isla tin otro colo. Di e manera aki e ta spera cu lo tin un ‘pool’ colectivo di material cu ta cla pa implementa den sistema educacional riba e islanan.
Proyecto por haya bida den sistema di enseñansa digital tambe.
Manera e minister encarga cu enseñansa, Rudy Lampe (RED) a yega di indica, tin borchi digital cu lo bay integra den klasnan rond di e isla, esaki como parti di e plan di enseñansa innovativo. Maas a bisa cu e minister ta conoci cu su proyecto y cu e ta apoya esaki. “Sigur ora bo mira e plan di innovacion den enseñansa, e proyecto aki ta fit net bon pasobra mi por haci e diseñonan interactivo, mi por anima nan, etc. pasobra ya e diseñonan ta digital.
Te awo e diseñador ta esun cu a financia e proyecto, pero den futuro e ta mira cu World Literacy Foundation lo hunga un rol pa e financiamento, pero tambe e comision nacional di UNESCO na Aruba, mirando cu nan como institucion ta enfoca riba calidad di enseñansa y programanan di enseñansa cu enfoke local. Maas, riba pregunta di Bon Dia, a indica cu docentenan por haci copia di e diseñonan pa uza den les y cu e no tin niun problema cu esaki. Kiermen cu pa metanan di enseñansa of metanan no-comercial, e diseñador no ta kere mester tin restriccion pa uza e imagennan, mirando e meta di e proyecto.
Mañan atardi 25 di februari pa 7 or te 9 or, Maas lo ta exhibiendo e buki ‘Mi Buki di Aruba’ na Biblioteca Nacional, e prome edicion di e buki cu varios diseño di ArubABC, den Papiamento pa publico en general. Aki personanan por cumpra un copia di e buki. Dialuna 2 di maart lo tin un tour special pa docentenan y otro profesionalnan den enseñansa, pa 4 or di atardi.
