Academia Arubaanse Voetbal Bond tambe a forma parti di e Bishita Real, na unda ayera diamars atardi pa 3:15 PM, Rey Willem Alexander y Prinses Amalia a bishita nan na Stadion Frans Figaroa.
Den esaki nan presencia e seccion di training di AVB su academia tanto di e muchanan homber como muchanan muhe, “esaki sigur ta un honor grandi pa e academy y sigur tambe un reconocemento pa e staf cu a hinca nan tempo y energia pa prepara nos hoben futbolistanan pa yega na un nivel mas halto,” nan a sigura.
Despues di e Bishita Real, redactor di Bon Dia Aruba a haya e oportunidad di entrevista Randolf Lacle ken a sigura cu algun tempo pasa nan a wordo informa cu kisas e academia lo por a forma parti di e programa di e Bishita Real unda esey no tabata algo sigur na e momento ey, pa motibo di varios opcion cu a wordo haya, despues ora nan a haya e noticia di e bishita di e reynan nan a bira hopi contento.
Lacle a bisa cu nan a prepara tur cos, diferente training a tuma luga unda tur cos a bay bon “y awe nos a prepara for di trempan, tur hende tabata entusiasma, nos ta hopi contento cu e clubnan tambe di e bario di Noord como Nacional, Bubali, United, entre otronan, a bin cu nan muchanan tambe pa wak e rey y e prinses, e rey mes a keda hopi impresiona y contento di mira e desaroyo, el a mira tambe cu nos train tin e parti di mucha muhe incorpora den academy cu ta hopi positivo, sigur un honor pa Arubaanse Voetbal Bond y mi ta sigur cu e rey y e prinses Amalia a keda contento cu e bishita”, Lacle a finalisa.
