Gobierno y United Nations Women a firma un MoU. Esaki a sosode den e conferencia, caminda a delibera riba e puntonan cu mester haya mas atencion pa fortifica e posicion di hende muhe na Aruba. Unda por crea mas oportunidad y logra oportunidadnan igual pa hende homber y hende muhe.
E representantenan di UN Women tawata na Aruba pa asisti den un conferencia hunto cu tur esunnan cu ta traha den e area di derechonan di hende muhe tanto den sector publico como den sector priva.
Diamars, dia cu ta celebra e dia di ser masculino, tawata e dia, cu Prome Minister ta considera un dia grandi, un logro grandi. Aruba y UN Women, representa pa Alison McLean a firma e MoU pa e ‘gender policy’ na unda a yega na palabracionnan concreto con UN lo yuda nos riba e maneho di genero pa brinda mas proteccion y crea oportunidadnan igual pa e hende homber y hende muhe. Esaki ta dirigi tambe pa e hende homber mirando cu den cierto areanan, e hende muhe ta haya mas privilegio y oportunidad cu hende homber. Nos kier crea un plataforma igual.
Segun e comunicado cu Bon Dia Aruba a ricibi ta indica cu Prome Minister Evelyn Wever-Croes a expresa : “Mi ta sumamente orguyoso di a logra esaki, producto di trabounan duro cu nos a bin ta haciendo ya caba pa algun luna hunto cu United Nations na New York”.
Durante su bishita na United Nations na september ultimo, Prome Minister a papia cu e Directora Ehecutivo di Un Women, Phumzile Mlambo na unda cu a yega na palabracionnan importante pa Aruba. UN Women a aproba pa yuda nos traha un maneho riba e posicion di hende muhe na Aruba. UN Women a comete su mes pa sostene Aruba pa bin cu un maneho integral pa cu e desaroyo di hende muhe/igualdad di genero.
