Prome minister Evelyn Wever-Croes y minister di Asuntonan Economico, Comunicacion y Desaroyo Sostenibel di Aruba, Geoffrey Wever, conhuntamente cu Ruisandro Cijntje minister di Asuntonan Economico y e vice-prome minister Ruthmilda Larmonie-Cecilia di Corsou, ayera mainta a firma un Memorandum Of Intent (MoU) pa e dos isla yega un paso mas cerca pa colaboracion economico.
Prome minister di Aruba Evelyn Wever-Croes a expresa cu esaki ta un logro grandi ora cu e ta mira Corsou cu Aruba traha hunto, ambos pais ta chikito y nan economia ta di tal scala cu si nan ta keda haci nan cosnan nan so, nan no ta logra loke nan kier logra, “nos tin retonan diferente pero hopi similaridad y si nos concentra riba lo cual nos tin den comun, nos por logra cosnan grandi pa pueblo di Aruba y di Corsou,” el a bisa.
Prome minister Wever-Croes tambe a trece dilanti e pandemia di Covid-19 cu a causa un crisis financiero pa e dos isla aki y henter mundo, pero awor e islanan ta progresando y cu ohala cu e firmamento aki esey por contribui mas na e desaroyo y progreso di e dos isla.
Vice-prome minister di Corsou Ruthmilda Larmonie-Cecilia a sigura cu nan ta contento y cu e firmamento aki nan ta demostra cu e islanan ta coopera cu otro como rumannan den Reino y esaki ta bay trece beneficionan tanto pa Aruba y Corsou.
Di su parti, Ruisandro Cijntje minister di Asuntonan Economico di Corsou a sigura cu nan ta contento pa bin hunto pa yega na palabracionnan pa nan sigui traha cu otro, pa mehora e posicion economico di nan paisnan.
E MoU cu nan a firma ayera segun Cijntje a señala, ta un muestra di accion, accionnan concreto, pa acelera procesonan cu hopi tempo a bin ta papia riba pero no a materialisa nan ainda “nos a bin pa fortifica lasonan cu nos tin hopi decadanan caba, area nan cu ta bay concentra riba ta e formalisacion di areglo mutuo, e Onderlinge Regeling cu ta regla acceso di mercado entre Aruba y Corsou, esaki pa facilita e comercio entre e islanan.”
Igualmente el a comenta cu acceso na mercado di Aruba ta “webo di galiña for di Corsou”, aki tin oportunidad di oro, pa stimula y facilita mas inversion di nan empresarionan tanto na Aruba como na Corsou, nan ta mira un aumento di inversion y esey ta bale la pena pa facilit’e di un forma concreto pa asina complementa y sostene nan desaroyo economico.
E ta pensa den un Aruba cu Corsou Investment Summit cu lo por tuma luga un biaha pa aña caminda nan ta encurasha negoshinan a base di proposito y no a base di causalidad, cooperacion riba e area di competencia ‘Fair Trade Authority’ pa complementa otro y asina yuda crece nan desaroyo economico, nan ta bay encamina esaki den un forma di un routmap segun el a expresa, caminda tin palabracionnan concreto y mara na tempo pa nan por realisa lo cual tin poni den e MoU.
“Di mi parti, lo mi sigui haci e contacto necesario pa nos materialisa otro temanan pendiente, manera reanuda e proyecto di Ferry entre Aruba y Corsou, cooperacion riba tereno di turismo cu dobel destinacion, nos ta haciendo e cooperacion aki caba cu e parti di crucero, nos sa como Aruba, Corsou y Boneiro , nos ta bay como uno na e conferencianan y bende nos islanan como un destinacion, nos tin cu haci esaki tambe como e parti turistico, e islanan den Caribe en general, no ta competencia di otro,” Cijntje a bisa.
Cooperacion riba tereno di sector creativo tambe ta otro puntonan cu el a trece dilanti y a señala cu e dos isla tin hopi potencial y si nan ta colabora cu otro, nan por conkista mundo, e industria creativo ta creciendo mas y di parti di naturalesa, e ta kere nan ta un luga unda cu mundo por bin y filma nan produccionnan den e dos isla.
Den su opinion, mester yega na un manera di cumpra conhuntamente pa crea beneficionan economico di scala, “mas hunto nos cumpra, mas bon nos por negocia prijsnan, pa nos pueblo tin cuminda y tambe combustibel cu ta subiendo drasticamente,” el a sigura.
E temanan aki nan ta bay discuti entre e ministernan concerni pa nan por logra un integracion mas concreto di nan mercadonan, pa Corsou por logra un crecemento economico y sostenibel, tambe pa ta un isla y un pais resiliente economicamente, Cijntje a bisa cu nan mester diversifica nan economia y crea mas mercado pa nan companianan por haci negoshi.
“Nos strategia di exportacion cu nos ta implementando ta yuda fortifica nos empresanan pa nan por competi, nos ta mira un potencial grandi den nos region y tambe mas leu, asina nos ta cerando acuerdonan cu Colombia, Republica Dominicana, Trinidad y Tobago y Surinam ken ta mercadonan accesibel pa empresarionan di Aruba.”
Cu e paso aki nan ta bay finalisa e formalisacion di acuerdonan mutuo pa empresarionan di e islanan tin acceso liber na ambos mercado y asina crea un mercado interno mas grandi pa ambos pais, como paisnan chikito pa hopi biaha nan tin infrastructura institucional cu ta pisa riba na presupuestonan y no ta efectivo ni eficiente, tambe ta dificil pa adkiri personal y conocemento pa funcionnan na nivel halto, door di colabora cu otro por evita di cada un ta inverti, cu por presenta servicio na otro of facilita na otro sin mester inverti demasiado.
Geoffrey Wever, minister di Asuntonan Economico, Comunicacion y Desaroyo Sostenibel di Aruba a expresa cu e MoU aki ta pa fortifica cooperacion pa e dos isla por cana y bay dilanti den un era nobo di desaroyo economico.
Den un encuentro cu e dos minister a tene den un biahe, nan a papia tocante e retonan cu e dos isla aki tin y di esey nan a realisa e similaridad di e desafio y retonan cu Aruba y Corsou tin, ademas di e oportunidad pa traha hunto riba tereno economico y asina nan a palabra e posibilidad pa explora e posibilidad aki hunto.
“Tempo pa papia a pasa, awor ta tempo pa nos traha concretamente pa mehora e calidad di bida di tur nos ciudadano y awe nos a tuma un paso mas cerca pa por logra esaki,” minister Wever a finalisa.
