Despues di firma di MoU, entre 6 pa 8 luna

Diabierna atardi gobierno di Aruba y gobierno di Corsou a firma un memorandum of understanding (MoU) relaciona cu e proyecto di e fast ferry di pasahero y carga. E compromiso aki inicialmente tin di haber pa studia e factibilidad di e proyecto aki y despues realisa esaki, ya cu ta un deseo di ambos pueblo.

E acuerdo aki ta pone den marcha diferente preparacion pa ehecuta e proyecto aki, entre otro e parti huridico of legalisacion, seleccion di operador di e ferry y construccion di e terminal. Nan ta mira riba e proyectonan aki beneficionan turistico, comercial, social,crecemento economico substancial, etc… pa ambos isla.

E acuerdo di compromiso aki a keda firma cu presencia di minister di Desaroyo Economico di Corsou, Steven Martina, hunto cu su coleganan minister di Aruba, minister presidente, Evelyn Wever-Croes, minister di Transporte Publico, Chris Romero, minister di Husticia encarga cu Migracion, Andin Bikker y minister di Enseñansa, Rudy Lampe.

Premier Wever-Croes

Premier Wever-Croes a cualifica esaki como “un momento historico” debi cu den e ultimo simannan aki nan a concretisa diferente logronan. Logronan cu tin di haber cu aspecto financiero cu e diferente  presupuesto, reforma fiscal y nan ta clausura cu e firma di e MoU aki.

El a bisa cu esaki ta un forma pa cera cu ‘broche di oro’ creando perspectiva y speransa pa habri 2019. E firma di e MoU ta un paso concreto pa bin cu e proyecto di fast ferry, segun minister presidente.

Prome Minister di Aruba a probecha e oportunidad aki pa expresa un breve mensahe den cuadro di e celebracion di Pasco y Fin di Aña. E mandatario ta spera cu e dianan nos dilanti por yena nos curason y tur hogar di hopi paz, harmonia, alegria y felicidad. Pero principalmente cu nos por celebra bunita den seno di nos tradicion familiar.

Minister di Transporte

Minister Romero a tilda e firma di e MoU cu Corsou como e “prome fase di un futuro briyante pa pueblo di Aruba, Corsou y muy specialmente pa San Nicolas.” El a indica cu e firma di e documento aki ta mustra e seriedad cu pais Aruba y Corsou tin cu e proyecto aki.

El a bisa cu pa hopi tempo caba a wordo papia di e posibilidad di habri un ruta cu un ferry entre islanan ABC cu e ta haya cu tabata practicamente un ‘soño imposibel di alcansa.’ Como un persona di San Nicolas e tabatin e soño for di chikito pa mira ‘pariba di brug briya pa su berdadero balor cu e tin y merece di nos comunidad.’

Pa e minister aki e firma di e MoU nan ta habriendo e porta di progreso pa nos pais, pueblonan di pariba di brug y specialmente pa San Nicolas. Pero tambe ta habri un posibilidad nobo entre ambos isla. No solamente como un transporte nobo entre e islanan pero tambe lo habri posibilidad nobo riba tereno economico, social, deportivo y enseñansa.

El a bisa cu e diferente rapport traha den pasado a yega di indica cu e ferry mester sali for di Barcadera. Pero el a propone y dicidi pa e sali for di San Nicolas. Di e forma aki nan kier articula e idea di San Nicolas Port Authority cu -segun minister Romero- nan ta bezig cune, ya cu e ley ta den departamento di legalisacion actualmente.

E siguiente paso ta pa traha riba un documento huridico pa tur aspecto di preparacion di e proyecto aki ta documenta. E ta un fase cu ta dura entre 6 pa 8 luna. Despues Aruba y Corsou lo dicidi kende lo bira e operador di e ferry y tambe cuminsa cu e preparacion fisico of construccion di e terminal di fast ferry. Esaki lo ta situa cerca di e curason di San Nicolas.

Minister Martina di Corsou       

Minister Martina a señala cu su gobierno kier duna nan compromiso tambe cu e proyecto aki cu el a cualifik’e como ‘sumamente interesante.’ Den pasado tabatin diferente intento pa concretisa e proyecto aki,  pero e ta haya cu pa concretisa un cos mester tres cos: “You need to be at the right place, at the right time, with the right things.” El a bis’e na Ingles considerando cu Cosecha a bira e escenario pa firma e acuerdo bilateral aki na San Nicolas.

E mandatario a bisa cu tanto gabinete Rhuggenaath di Corsou como gabinete Wever-Croes di Aruba, hunto tin e deseo di bira e proyecto aki realidad. Aunke nos ta isla chikito pero danki na e conectividad pagabel nan por amplia nan mercadonan.

Tambe nan a cuminsa intercambia idea pa asina e teamnan di diferente disciplina deportivo y social por ta mas activo entre nan danki na e conectividad cu e ferry lo bay ofrece. Pero tambe e parti economico lo haya un estimulo y gobierno di Corsou ta interesa pa crea un fortalecemento como destino turistico.

Minister di Husticia

Di su banda minister di Husticia, Andin Bikker (POR) a bay atras ora cu na 2012 den seno di un reunion di IPKO na St. Maarten nan a bin cu un resolucion pa incentiva pa tin mas conexion cu e islanan di reino Hulandes.

E mandatario a bisa cu e facilidad di un ferry entre Aruba y Corsou y eventualmente den futuro tambe Bonaire, lo brinda diferente dimension den economia cu ainda nan no a explora pero seguramente lo bin den mente.

E mandatario a indica cu den e ultimo leynan cu a keda aproba, gobierno di Aruba a introduci den e ley di admision nobo (LTU) un par di base tecnologico pa impulsa e proyecto di ferry entre otro e concepto di biometria cu lo facilita e proceso dirigente pa atende cu e pasaheronan di e ferry.

Igualmente el a manifesta su satisfaccion pa e proyecto aki lo wordo ehecuta na San Nicolas pa asina nan por haya un impulso economico cu ta sumamente necesario den e tempo aki. Tambe a duna reconocimento y gradicimento na Rafael Estrada kende a brinda asesoria y conocemento riba e tereno aki.