Mientras Corsou a cancela un contract di almacenahe di petroleo cu SPS Drilling E&P seis siman despues cu a firma esaki, Aruba tambe ta hayando dificultad pa monetisa su tankinan di almacenahe, resaltando e reto di monetisa activonan petrolero den Caribe, cu antes tabata maneha pa e empresa estatal Venezolano, PdV.
Segun un relato di reportero Patricia Garip pa portal noticiero ArgusMedia, e contract di dia 15 di september cu e estatal Curaçao Refinery Utilities (CRU) tabata cubri 5.8mn bl di almacenahe na terminal Bullen Bay. Den un entrevista dos dia despues, hefe ehecutivo di SPS Drilling E&P, Manuel Chinchilla, a bisa Argus cu fuel oil y productonan di oil limpi lo cuminsa yega na mita di october. E cargamentonan nunca a materialisa.
Den un memo interno pa empleadonan comparti cu Argus, CRU a culpa SPS Drilling E&P pa faya di cumpli cu e contract den contexto di condicionnan di mercado altera.
“E mercado pa almacenahe y facilidadnan di tanki tabata impacta negativamente despues di firma e contract cu SPS. Lagando un banda varios esfuerso di RdK pa tene SPS na su contract, nan a default riba e contract. E desaroyo aki a forsa RdK pa termina e acuerdo cu SPS”, e memo tabata bisa.
SPS Drilling E&P no a comenta inmediatamente. Pero un fuente cercano na e compania a bisa cu e acuerdo a wordo termina prematuramente pa CRU despues cu esaki a nenga di upgrade e terminal pa facilita importacion di sikiera dos futuro cliente di SPS.
Bullen Bay y e refineria di 335mil bpd Isla di Corsou, cual ta para, tabata opera pa PdV bao un acuerdo di huur a largo plaso cu a termina na december 2019. Cuminsando rond di mediado di 2019, Corsou ta buscando operadornan di refineria nobo mientras ta lucha contra debe laboral residual y cautelosamente ta nabega restriccionnan asocia cu sancionnan Mericano financiero y di petroleo riba Venezuela. Un acuerdo preliminar cu Klesch di Alemania a collapse e aña aki. Den un tender nobo, Corsou ta spera di selecta un preferred bidder cu cual lo cuminsa negociacionnan fin di e luna aki of na december.
Islanan desierto
Aruba, manera Corsou, ta buscando pa monetisa su tankinan di almacenahe y revitalisa of duna un proposito nobo na su refineria di 235mil bpd na San Nicolas, anteriormente propiedad di Valero. E refineria desmantela mester a wordo remodela pa e brasa di refinacion di PdV na Merca, Citgo, bao un contract di 2016 cu a caba malo.
Un acuerdo breve cu specialista di activo den problema Emqore a termina luna pasa, segun un oficial senior di gobierno Arubiano a bisa Argus.
Cosrou y Aruba tabata parti di e anteriormente bullicioso red logistico di PdV den Caribe Hulandes, cu tambe tabata inclui Bonaire y St. Eustatius. E compania Venezolano a cuminsa retira for di e activonan cerca di e costa, mientras e tabata perde capacidad di produccion na cas y a bin bao sancionnan Mericano cuminsando na 2017.
Cu turismo afecta pa e pandemia di Covid-19, e islanan awo ta bao stress financiero significante, parcialmente mitiga cu sosten Hulandes.
