Prome minister di Corsou, Eugene Rhuggenaath, y Evelyn Wever-Croes prome minister di Aruba, a reuni cu varios instancianan dianan pasa na Washington, pa atende e tema di e crisis migratorio di Venezuela y su impacto riba Aruba y Corsou. Bek na Aruba, diahuebs ultimo Wever-Croes a splica cu na e momento cu Merca ta tumando decision riba sancionnan y licencia, e efecto cu esey ta trece pa e dos islanan ta importante pa tene na cuenta.
Wever-Croes a manifesta cu el a bisa den reunion cu Aruba ya caba a hereda un problema financiero gigantesco. “Aruba tin un explosion social cu ta serio, y aparte di tur esey, nos mester enfrenta tur e retonan cu tratadonan y compromisonan internacional ta trece cune”, el a sigura.
Tambe Wever-Croes a declara cu nan a reuni cu Luis Almagro, Secretario General di Organisacionnan di Estadonan Mericano, kende ta hungando un papel hopi importante pa yega na un transicion pacifico na Venezuela. Almagro a pidi nan un poco mas di pasenshi, pa tene cuenta cu e situacion di e momentonan aki.
Di loke ta trata e decision strategico cu ta wordo tuma, el a splica cu nan a papia cu David Hale na Departamento di Estado Mericano, esun di herarkia mas halto pa tuma decisionnan strategico, y nan a papia di estrecha e lasonan entre Aruba, Corsou y Merca, pa yuda nan lo mas posibel.
Despues nan a reuni cu Kupperman, kende ta Deputy National Security Advisor na Cas Blanco riba e riesgonan di siguridad cu e islanan ta enfrenta, mirando un emigracion masal sin precedente. Dor cu no ta conoce ken ta drenta na e islanan pa via di screening debi y a yega na cierto palabracionnan.
Riba e parti humanitario a splica cu aworaki nan a haya hopi comprension di parti di autoridadnan Mericano. “Nan ta mira Aruba y Corsou cu un rol hopi importante den e reconstruccion di Venezuela” Wever-Croes a sigura.
Pa finalisa, tambe tabatin reunion cu World Bank caminda prome minister Wever Croes a bisa cu nan ta den proceso di yuda Aruba pa fortifica su economia y asina por yuda mas hende, ‘pa motibo cu e economia cu nos tin aworaki, nos tin cu yuda nos hendenan prome cu yuda otro hendenan”.
