Aruba y Corsou a expresa nan interes den areglonan similar pa establece un minimo social. Durante un reunion cu minister Hulandes di Politica di Pobresa saliente, Carola Schouten, e ministernan di e dos islanan aki a discuti e asunto en cuestion.

Esaki a keda reporta den un articulo di noticiero di Corsou, CuraçaoChronicle.

Minister Schouten a splica con Hulanda a haci investigacion riba cantidadnan adecuado pa hende na Bonaire, Saba y Sint Eustatius durante su bishita na Corsou dia 27 di october.

Na Corsou, un abrumante 60 porciento di e poblacion ta biba cu salario minimo, segun minister di Desaroyo Social y Labor, Larmonie-Cicilia. E aña aki, salario minimo a aumenta di 9.62 pa 10.70 florin pa ora, y e beneficionan di asistencia social a aumenta na 422.24 florin pa luna. Sinembargo, e minister ta admiti cu e aumentonan aki ainda no ta suficiente pa por sobrevivi.

Cu un poblacion di 150mil habitante, aproximadamente 45mil Curasoleño ta biba bao di linea di pobresa. Esakinan ta cifra oficial, pero e realidad por ta mas severo ainda. Actualmente tin un investigacion andando pa determina e grado real di pobresa riba e isla.

Na december 2022, minister di Labor di Aruba, Glenbert Croes a anuncia un aumento di salario minimo.

E suma di salario minimo pa un empleado cu tin 18 aña di edad of mas a bira entrante 1 januari 2023, 1.893,40 florin pa luna y 441,60 florin pa siman.

Un minimo social ta garantisa cu hende por sobrevivi hasta sin traha, y ta obliga gobierno pa ahusta salario minimo y beneficio na momento cu costo di bida ta aumenta. E ahuste aki ta sucede automaticamente. E preocupacion na Den Haag cu aumento di salario y beneficio lo impulsa inflacion mas ainda den Hulanda Caribense y reduci e incentivo pa traha no a resulta den cancelacion di e aumento planea. Al contrario, ta bay ahusta e sumanan realisticamente.

Pa preveni cu e aumentonan aki ta conduci na costonan mas halto pa haci negoshi, a dicidi cu ta bay compensa e companianan. Tweede Kamer y minister Schouten a tuma e decision aki.

Como paisnan autonomo dentro di Reino, Aruba y Corsou ta determina nan politicanan di pobresa y e nivel di nan beneficio y salario minimo. Hulanda ta dispuesto pa duna mas conseho, pero e escogencia ta keda na e paisnan mes, segun minister saliente Schouten a enfatisa.

Minister Rocco Tjon di Aruba y Ruthmilda Larmonie-Cecilia di Corsou a indica cu nan kier tuma stapnan concreto den e lucha contra pobresa. Aruba, den colaboracion cu Nibud y comision di investigacion riba minimo social, ta bay haci investigacion riba e problema di pobresa na nos isla.

Corsou di su banda ya a yega na un acuerdo cu Nibud pa investigacion y recomendacion pa combati pobresa. E intercambio di conocemento y metodologia ta central pa e maneho di ambos isla.