Den su meta pa habri bek un ruta comercial stabiel, sigur y cumpliendo cu tur regla internacional, presidente di Stichting Rancho, Clifford Rosa a biaha pa Colombia ayera.
Bon Dia Aruba a topa cu ne na aeropuerto, caminda el a informa cu e mester biaha pa Colombia pa un reunion urgente cu autoridadnan regional di Guajira, entre nan su gobernador Weilder Guerra y tambe cu funcionarionan di nivel nacional.
El a laga sa cu intencion di biahe aki ta inclui entre otro evaluacion di e ruta ideal pa activa e relacion bilateral Aruba/Colombia. Presidente di fundacion Rancho ta haya e paso aki masha positivo ya cu finalmente nos por mira algun resultado di e esfuersonan cu nan ta bin haciendo pa habri e ruta comercial y cultural entre ambos region.
E intencion tras di esaki ta entre otro esunnan di abastece nos isla di productonan agricola fresco y di bon calidad. Ya caba nan ta trahando riba e parti logistico aki y e lo probecha su biahe pa bay e ciudad di Santa Marta, unda tin un grupo bon organisa di e sector primario interesa pa exporta nan productonan pa Aruba.
Sr. Rosa lo realisa un biahe na e ciudad historico di Cartagena, unda tin un compania di nabegacion cu tin e disponibilidad di un barco cu bon capacidad pa opera e ruta aki. Logicamente e ta bay papia cu nan pa sondea tur posibilidad pa pone den marcha e acuerdo di cooperacion y/of MoU cu a keda firma pa duna bida na e relacion comercial y familiar entre Aruba y Guajira, cu ta uno historico.
