Apertura di frontera entre Aruba cu Venezuela ta sigui keda un noticia debi cu pa basta luna palabracionnan entre e dos pais no ta avansa, sinembargo, prome minister Evelyn Wever-Croes a señala na Bon Dia Aruba cu nan ta wardando ainda.

Asina e prome mandatario a señala diaranson ultimo riba e pregunta di redactor den cual el a sigura cu “e tema di Venezuela ta canando su caminda. Nos a invita Venezuela pa reunion pa trata e reapertura di frontera. Nos a invita pa reuni na Curacao. Pero nan no a reacciona ainda”.

Mirando cu prome minister ta na Hulanda for di algun dia caba, el a informa cu nan ta reuniendo cu diferente mandatario y instancianan na Den Haag pa lo cual a ser puntra si tabatin un update pa loke ta trata apertura di frontera cu e pais bisiña.

Un ultimo noticia riba e topico aki a bira conoci dia 3 di october ultimo unda e mandatario a splica cu “Aruba kier habri frontera bek cu Venezuela pero mester ta bao condicionnan hopi bon defini”, durante un entrevista na otro medio di comunicacion prome minister a señala cu na 2018 e presidente Venezolano Nicolas Maduro a cera e fronteranan cu Aruba y Corsou na unda a acusa Aruba di horta koper for di Venezuela, e fronteranan cu Venezuela na e momento ey a keda cera pa aproximadamente cinco luna hasta cu e gobiernonan di Aruba y Venezuela a yega na palabracionnan concreto bao ki condicionnan por habri e frontera bek.

“Aruba no ta horta koper di ni un hende y nos no ta acepta cu Aruba ta haya un mal nomber pa via di esey”, prome minister a bisa.

Entre luna di mei cu juni a habri e fronteranan bek den hopi bon palabracionnan entre Aruba y Venezuela y despues na januari di 2019 Maduro un biaha mas a cera e fronteranan cu e islanan Aruba, Corsou y Boneiro pa motibo cu Corsou tabata bay haci un hup humanitario pa yuda Venezuela y esey tabata e motibo pa por cera e fronteranan.

“Na e momento ey tabata un golpi hopi duro pero nos tin forsa di resiliencia y nos a busca otro alternativanan”, el a indica.

Na luna di mei di 2019 a dicidi di habri e fronteranan bek cu Aruba so, no cu Corsou ni Boneiro manera prome minister a sigura, pero Aruba no tabata cla pa haci esey pa motibo cu no tabatin ningun palabracionnan ni bao ki condicionnan por haci e reapertura.

For di e momento ey te awor autoridadnan Venezolano no a yega na mesa di negociacion pa por habri bek e frontera bao condicionnan sigur y responsabel.

Pa e motibo aki, Aruba ta invita autoridadnan di Venezuela un biaha mas pa sinta na mesa na Curacao pa haci palabracionnan concreto pa habri frontera di un manera responsabel debi cu ta existi sentimentonan mixto tanto pa personanan cu ta biba na Aruba cu kier biaha pa Venezuela y pa comerciantenan cu kier importa productonan na un prijs mas economico.