ORANJESTAD – Chikito cu nos isla por ta, manera nos tur sa tin diferente persona di diferente nacionalidad riba nos isla. Sea cu nan ta biba permanentemente aki, traha aki, studia, bishita famia of ta pa disfruta di e isla durante di nan vacacion. E echo cu Aruba ta atrae personanan di diferente parti di mundo ta haci nos diferente den diferente manera.
Xavier University School of Medicine a wordo funda na 2004. E universidad di medicina aki, pa con straño e por zona, no ta un scol conoci pa hopi persona local. Sinembargo e ta cas pa diferente studiante internacional. Studiantenan cu ta bin Aruba biba y studia aki pa varios aña.
Den un entrevista exclusivo cu Bon Dia Aruba a haci, a papia cu Rehmen cu ta terminando su estudio di medicina aki na Aruba y ta bandona nos isla otro aña. El a conta cu algun nacionalidad di studiantenan na e scol ta bini for di Jordan, Siria, Merca y Canada entre otro. E universidad aki ta ofrece su studiantenan “pre – med” cual ta e programa base cu studiantenan cu no tin un bachelor mester prome cu nan por studia medicina. Tambe nan ta ofrece estudio completo di medicina. Locual cu ta haci esey atractivo pa studiantenan bin Aruba pa studia medicina na e universidad aki ta cu e gastonan di e scol ta hopi mas abou cu na Merca. Mayoria studiante ta bin e scol durante di nan añanan di estudio pa spaar placa, haciendo Aruba nan segundo cas mientras cu nan ta studia.
E ta notabel cu no ta hopi local ta asisti e universidad aki y tampoco ta considera e opcion aki, sino cu e ta un escogencia hopi popular bou di studiantenan internacional. Tin algun local cu ta atende e Xavier, y nan ta haya e oportunidad pa cera amistad cu studiantenan di full rond mundo, riba nos isla. Esaki ta un experiencia cu studiantenan Arubiano ta experiencia solamente ora cu ta bay studia den exterior manera na Europa of Merca. Rehman a menciona cu pa un studiante local ta ricibi 25% di descuento for di e costo di e universidad. Na Universidad di Aruba tambe sa tin studiantenan internacional cu ta scoge pa studia aki, pero e grupo tambe ta hopi chikito.
Durante di e entrevista cu Rehmen, el a expresa cu e ta hopi contento pa ta riba e isla y ta contento cu e experiencia cu el a obtene for di e transicion cu e mester a haci for di Merca pa un isla chikito manera Aruba. “Ahustacionnan menor cu cualkier persona por custuma cun’e, bunita playanan cu mi no tin tempo pa disfruta di dje, y tambe tur hende local cu ta a trata mi semper den un forma hopi amabel y cla pa yuda.”
Segun Rehmen algo cu e ta haya super necesario pa personanan cu ta considera biba aki na Aruba ta un auto. El a bisa: “No tin ningun otro manera pa pone, pero e accesibilidad pa yega tur caminda ta esencial na Aruba. Y e manera mas efectivo ta esey.”
Basicamente for di un dia pa otro Rehmen tabata na Aruba, memey di Caribe y den un klas yena cu studiantenan internacional di rond mundo. Sinembargo el a haya su caminda y a ahusta su mes na e estilo di bida di un isla “the Island life”. El a compliment nos isla bisa cu e transicion a bay hopi facil. Rehmen ta finalisando su estudio e aña escolar aki na un manera exitoso pa eventualmente e continua cu su carera den medicina. Sinembargo pa Rehmen Aruba lo semper keda representa un parti di su biahe cu ta hiba su persona na su futuro.
Locual ta remarcabel ta cu Xavier University ta ofrece studiantenan un luga pa nan evoluciona y siña hopi, den aspecto educacional y tambe personal. Studiantenan cu a pasa den duro nan pais natal, ta sinti nan mes sumamente bendiciona di tin e oportunidad pa studia na Aruba leu for di conflicto, pobresa y guera. Pa e studiantenan aki specificamente Aruba ta manera un sitio sigur y te hasta refugio. Cada studiante tin nan propio storia, di nan sacrificio y pakico nan ta scoge pa bin studia na Aruba, of nan simplemente a scoge Aruba. Den e aspecto ey Aruba a prospera den e sentido cu nos ta ricibi personanan internacional man habri cual ta un atributo cu Aruba mester mantene.
Aruba Today Version available in English here
